Aizawl, Jymmang 4: Ki arngut ki nong America (USA) ki bym don ia ki pass kiba biang, ki la shah pynphai noh na ka kad liengsuin Lengpui jong ka jylla Mizoram ha ka sngi saitjain, la iathuh ki tyllong khubor.
Na ka liang ki heh ophisar kila pyntikna ba kine ki ar ngut ki nong shong ka ri America ki kynthup ia u Walter Frederick Kuhn bad ka Sharon Clodfelter Kuhn kila wan poi ha Lengpui Airport ha ka 2 tarik mynta u bnai Jymmang bad kila shah bat ha ki ophisar namar ba kim don ia ka Protected Area Permit (PAP) kaba dei ka pass kaba donkam ia kino kino ki bar ri kiba wan ban jngohkai ia ka jylla Mizoram.
Ia kine ki ar ngut ki nong America la pynphai noh da ka lieng suin Indigo Lengpui – New Delhi ha ka sngi Saitjain.
Katkum ki tyllong khubor, kine ki ar ngut ki nong America kim shym la don ne ioh satia satia ia ka PAP, ia kaba la pyntreikam biang hapoh ka jylla, naduh ka 17 tarik u bnai Nohprah, 2024, hadien ka jingbym treikam jong ka permit, haduh 14 snem.
Shuh shuh ka tyllong khubor la iathuh ruh ba hadien ba la pyntrei kam biang ia ka PAP, I aki jingtip la phah sha ki Embassies, bad baroh ki liengsuin kiba leit sha kad liengsuin Lengpui la pynbna ia ka jingdonkam ia ka permit shwa ban mih.
Ha shwa ban pyntrei kam biang ia ka PAP, ki bar ri kiba wan rung sha ka jylla Mizoram ha ryngkat bad ka visa ka jong ki bad ki dei ban pyntip sha ka tnad Special Branch jong ka Crime Investigation Department hapoh 24 kynta jong ka jingwan poi.
Kum ban shu kdew hangne ba baroh ki nong shong shnong ka ri India ki bym dei ki trai shnong jong ka jylla Mizoram ki donkam ban apply ban ioh ia ka Inner Line Permit (ILP) ban iuh kjat hapoh ka jylla Mizoram bad ia ka ILP lah ban ioh na kad liengsuin haka por ba ki wan poi.
