Aizawl, Jylliew 20 : Ka Sorkar Mizoram kala mynjur ban pynrung kyrteng Biometric noh ia ki 34,000 ngut ki phetwir na Myanmar, kiba riehtngen mynta la lai snem ha Mizoram.
Ka Sorkar Jylla kala ap mynta satang ia ka jingai jingbtheh na ka Ministry of Home Affairs (MHA) ban sdang ia kane ka kam.
Kumba 34,000 ngut ki phet wir na Myanmar kila riehtngem ha Mizoram bad kiwei ki Jylla ka thain Shatei Lam Mihngi hadien ba ki shipai Junta kila shimti ia ka bor synshar ha Myanmar.
Kat kum ka jingiathuh ki Heh Ophisar, ka Sorkar kala dep pynkhreh ia ka portal/website ban pynrung kyrteng biometric ia kine ki phetwir hynrei kane ka kam kan sdang hadien ba ioh ia ka jingbthah na ka MHA.
Myntri Rangbah ka Mizoram Lalduhoma dang shen ula ong ba ka Sorkar Jylla, kala dep rai ban pynrung kyrteng biometric ia ki phetwir na Myanmar bad kala dep shna ruh ia ka portal ban lum ia ki jingtip baroh.
Kumba 10,550 ngut ki nong Myanmar kila sah ha ki 111 tylli ki ktem iarap ba shipor ha ki 6 tylli ki District katba 9300 kila leit sah bad ki paralok lane ki bahaiing hasem bad don ruh kiba la shongwai.
Kumjuh ruh, haduh 8000 eiei ki nong Myanmar kila leit riehtngen ha ka Jylla Manipur ba kynthup haTengnoupal, Chadel, Churachandpur bad Kamjong District bad ka Sorkar kala dep ban lum kyrteng biometric ia kiba bun na kine ki phetwir.
Kiba bun ki phetwir kila shah pynphai pat sha Myanmar lyngba ka khappud kaba don ha Moreh jong ka Jylla Manipur.
