Guwahati, Jylliew 08: Ka Enforcement Directorate (ED) ka la pynlong ia ka jingkhynra ha ki khyndau tylli ki jaka ha ka thain Champhai jong ka Jylla Mizoram kum shi bynta ban tohkit halor ka jingkynnoh ba ka don ka jingkhaii tuh ia u kwai sha bar Ri kaba T.970 klur bad ka kam thok pisa kaba don jingiadei bad ka Ri Myanmar.
Iaki jingtalasi la pynlong katkum ka Prevention of Money Laundering Act (PMLA) bad la talasi ia ki jaka sah bad ki jaka treikam jong ki katto katne ngut ki nongkhaii bad ki trai jaka ha Champhai, ka jaka khappud kaba iajan bad ka Ri Myanmar.
Kane ka jingtohkit ïa ka kam thok pisa ka mih na ka ejahar ba la register da ka Central Bureau of Investigation’s Anti-Corruption Branch ha Imphal hadien ka jingbthah na ka Gauhati High Court ha ka jingbishar iaka public interest litigation bad ka jingshalan tuh ïa u kwai na Myanmar sha India.
Ka ED ka iathuh ba haka jingtohkit la lap ïa ka kynhun ki nong Burma bad la kynnoh ba ki pynïaid beaiñ ïa u kwai lyngba ka wah Tiau sha India lyngba ki jaka khappud ha Zokhawthar bad Champhai khlem da ïoh jingbit na ka Custom.
Ki kynnoh ba ki nongpynïaid na ka thaiñ ki la pdiang ïa ki mar na Burma bad ki la buh iaki kudam ha Champhai bad ki kit lyngba ka Vairengte hajan khappud Assam-Mizoram.
La kynnoh ba la bei tyngka da ki nongkhaii bad ki nongbei pisa kiba don ha Silchar, Assam, kiba la phah ia ka pisa lyngba ki bank sha ki account ba la pyniaid da ki briew ha Mizoram.
Ka ED ka la ong ba ka jingsiew sha ki nongpynoi mar ha Myanmar la siew da ka pisa India bad hadien pat la pynkylla sha ka pisa Myanmar Kyat lyngba ki jaka pynkylla pisa kiba treikam hajan khappud.
Ka la kynnoh ba la pynmih ïa ki bill thok jong ka GST e-way kiba shongdor palat T.337 klur ha Champhai hapdeng u snem 2021 bad 2024.
Katkum ka jingong jong ki nongtohkit, ki kot ki sla ki dei kiba la kyrshan da ki kot pynshisha kper thok bad ki kot pynlait khajna thok, watla ki trai kper kiba iadei kam kim shym la shah pynrung kyrteng hapoh ka GST.
Ki jingwad bniah ki long shi bynta jong ka jingtohkit kaba kham jylliew halor kaei kaba ki bor badei khmih ki batai kum ka lynti khaii tuh kaba stad bha kaba kynthup ïa ka jingwanrah mar be-aiñ, ka jingpynlong thok ïa ki kot ki sla, ki jingpynïaid pisa bad ka jingpynkylla ïa ki pisa ba la ïoh lyngba ka kam khaii.
Ka ED kam pat pynpaw bniah ia ki jingkurup ba la leh ha ka por ba talasi.
