Aizawl, Jylliew 30: U Myntri Rangbah jong ka jylla Mizoram u Pu Lalduhoma, hadien ka jingkharoi ba kynsan u jingdih ba ka imlang ka sahlang kam lah ban pdiang, da ka buit thymmai u la khot ia ki paidbah nong shong shnong ban iakhun pyrshah ia u drug hapoh ka jylla Mizoram kaba kiew sted bha.
Mynta ka sngi, u Pu Lalduhoma u la ia snoh kti lang bad ka Central Young Mizo Association (CYMA) ha ka drugs disposal programme ia kaba la ioh ban sakhi ia ka jingpynjot ia u drug uba shong dor kumba ₹4.29 klur.
Ia kane ka programme la pynlong da ka CYMA Central Anti-Drugs Squad (CADS) kaba la long ha Central YMA Hall ha Aizawl, kane ka programme ka long ban pynjot bad ban pynsniew noh ia ki drug ba la ioh ban kurup hapdeng ka 15 tarik u bnai Lber haduh u bnai Jylliew 2025. Ha kane ka sngi u Myntri Rangbah u la long kum u kongsan bad da lade hi u la ia shim bynta ban pynjot ia shi bynta jong u drug.
“Ngi don ia ka jaka ne ka iing kum ki rehabilitation ba bha kiba la biang lut ka jingshah hikai kum ha ka skill training bad ki lad ki lynti ban kamai kajih. Tang kumta ngin lah ban pyntikna ba kito kiba la jop naka jingshah teh mraw ha une u jingdih ba kin lah ban im ka jingim ba thymmai haka imlang ka sahlang,” u la ong.
U la pyntip shuh shuh ba ka sorkar jylla kala don ka jingiakren bad ki nongialam jong ki kynhun Balang bapher bapher ba kin sdang noh ia ki rehabilitation centres kiba biang,kaba lah ban wanrah ia ka jingkylla sha ka jingthmu ba bha bad ruh ban sdang ha ryngkat bad ka jingngeit.
Na ka liang u Myntri Rangbah u la ai ka jingiaroh ia ka CYMA kaba la trei shitom ban wanrah ia ka bha ka miat ha ka imlang ka sahlang “Ki jaka trei kam kum ka CYMA kidei ki bud lum haka imlang ka sahlang ka jong ngi. Ka jingshlur badka jingaiti ka jong ki ban iakhun pyrshah ban pynduh jait ia u drug dei ban ai ka kti kamon bad ka kti kadiang ban kyrshan ia ki da baroh,” u la ong.
Ia kane ka programme la pyniaid da u President jong ka CYMA u Pu Lalhmachhuana, uba la pynshai ha kaba iadei bad kane ka jingpynjot bad pynduh pyndan ia u drug kiba la ioh ban kurup da ka CADS bad ym shym la aiti sha ki pulit ne ka tnad excise.
Hapdeng u bnai Lber 15 tarik haduh ba kut u bnai Jylliew, ka CADS kala ioh ban kem haduh 809 ngut ki briew kiba ia donkti ha kaba iadei bad ki case jong u drug. Napdeng kine, 440 ngut kila ioh ia ka jingia syllok, 37 ngut kila shah sumar sha ki rehabilitation centres, 48 ngut la aiti noh sha ka Excise Department, bad 4 ngut sha ki Police.
Namar kane ka jingma na kine ki jingdih buaid ba sniew kiba la ioh ban kurup, ki dkhot jong ka CADS kin iai bteng ban teh lakam ha kine ki sngi ban wan ruh kumjuh.
