Aizawl, Iaiong 17: Ha ka jingkhynra pyrshah ia ka jingkhaii beain ia u kwai areca nuts uba wan napoh Myanmar, ki bor pulit ka Mizoram bad ki shipai Assam Rifles ki la ioh ban kurup haduh 5.44 lak kilo une u jait kwai u ba shongdor kumba T.31.73 klur ha kine ki 100 sngi ba la dep.
Hadien ka jingpynmih hukum da ka sorkar jylla, ki bor pulit ki la shim ia baroh ki sienjam ban tehlakam ha kaba iadei bad ka jingkhaii beain ia kine ki jait kwai tyrkhong kaba la lam sha ka jingioh kurup kaba bun bah naduh kine ki 100 sngi kiba la dep, katanaduh ka 1 tarik u Kyllalyngkot haduh ka 10 tarik Iaiong 2023.
Na ka liang ki pulit ki la rejistar ruh haduh 19 tylli ki FIR bad kem noh ia 61 ngut ki briew kiba donkti ha kine ki kam khaii beain ia kine ki jait kwai.
Namar ka jingjur ka jingkhaii beain napoh Myanmar bad namar ka jingpyrkhing jong ka sorkar Assam ha kaba iadei bad ki kali kiba pynkit ia kine ki jait mar, kumta ruh na ka liang ki nongrep kwai ha ki jylla ka thain shatei lammihngi (Northeast) khamtam ka Mizoram bad Tripura kila shah ktah jur bad dawa ruh ia ka jingtuklar jong ka sorkar pdeng.
Ka jingkhaii beain ia une u kwah areca nut ka la nangkiew katba nang mih ki sngi ka ba la pynlong ruh ia ki bor pahara pulit kaba kynthup ia ki shiai ka Assam Rifles ba kin ioh ban kurup ia kine ki jait mar kiba la kot da ki hajar ton, kata nalor u drok, ki jait mrad kiba kham pher lem bad kiwei pat ki mar ia kiba la khaii beain napoh Myanmar.
“Ngi dang iai peitngor da ka jingkut jingmut ban bteng ha ka jingialeh da ka jingkyrshan lang jong ki nongshong shnong bad ki kynhun kiba iadon bynta ban khanglad ha kaba iadei bad ka kam khaii kwai beain,” ong u heh pulit.
