Aizawl, Rymphang 27 :Ha kawei na ki jingioh kurup drok kaba heh tam ha ka jylla, ki shipai ka Assam Rifles ha ryngkat ka kynhun na ka tnat Custom na Champhai district hynnin ka sngi U Blei ki la ioh ban kurup ia u drok heroin u ba shongdor haduh T. 13.3 klur bad kem noh ia arngut ki briew na ka jaka shong shnong kaba hapoh Champhai Dist.La pynlong ia kane ka jingkhynra hadien ba katei ka kynhun ka la ioh ia ka jingtip kaba thikna.
Hadien ia une u drok heroin No-4 la aiti noh sha ka tnat Custom ka Champhai ha katei ka juh ka sngi na ka bynta ban leh ia kaba donkam.Kane ka jingkhynra da ka kynhun ki shipai Assam Rifles bad na ka tnat Custom Preventive Force na Champhai ka long ka jingjop kaba khraw ha ka jingiakhun pyrshah ia u drok hapoh ka thain.
Na ka liang ki bor sorkar ki la kut jingmut ruh ban shim da ki sienjam kiba tyngeh pyrshah ia ki nongkhaii drok khnang ban pynthikna ha kaba iadei bad ka jingpyrshang ban rat dyngkhong ia kine ki kam bymman na ka jylla Mizoram hi baroh kawei.
Kane ka jingioh kurup kan long ruh kum ka jingmaham ia baroh kito kiba donkti ha ki kam khaii drok bad halor kiwei pat ki kam beain namar na ka liang ki bor ka ain ki la long kiba peitngor ban khanglad ia kiba kum kine ki kam bymman bad ban pynshitom tyngeh ia kiba donkti.
Kane ka jingtrei borbah jong ki shipai Assam Rifles bad na ka tnat Custom na Champhai ka dei ruh ban ioh ia ka jingiaroh.Kham hashwa, kata ha ka 19 tarik mynta u bnai, ki shipai ka Assam Rifles ha ryngkat ki bor pulit ka Mizoram ki la ioh ban kurup ia u drok heroin u ba shongdor haduh T.19.5 lak bad kem noh ia uwei u briew uba donkti na ki bynta khappud ka India-Myanmar ha khappud ka Mizoram.
