Nongstoiñ, Nailar 7: Uwei u Ophisar Garo ula mih madan mynta ban pynbna ialade kum u kyrtong ban aireng ha ka elekshon MLA 2023 na Rambrai-Jyrngem Constituency kaba mihkhmat da u MLA ba shah sospon jong ka Congress Bah Kimfa Marbaniang.
Une u Ophisar u dei u RG Momin uba la shongthait naka kam kum u Additional SDSEO ka Tnad Pule Puthi ka West Khasi Hills District.
Haba pynbna ia kane hapoh ka jingialang paidbah bala pynlong hynnin ka sngi ha madan ka skul St John Higher Secondary School Nongkroh, Rambrai, u Momin ula pyntip ba haba sdang ula iaid paidbah ban pynshai ba u don jingthmu ban mih aireng ia kane ka elekshon na ka NPP hynrei mynta ula rai ban iakhun noh kum u kyrtong shimet.
Lah ban kdew hangne ba ki Nongialam ka NPP hynnin ka sngi ha ka jingialang ha Mylliem, kila pynbna ia u MLA ba mynta Bah Kinda S Marbaniang ba un long u kyrtong ka party ha ka elekshon 2023 na Rambrai Jyrngam Constituency.
Kat haduh mynta, san tylli ki kyrteng kila mih ban aireng ia ka elekshon ban wan na Rambrai-Jyrngam bad kine ki kynthup ia u Bah Kimfa, u MLA barim Bah KP Pangniang na ka HSPDP, u Bah Spastarlin Nongrem n aka BJP, u Bah Goldenstar Nonglong na ka Congress, bad u RG Momin kum u kyrtong shimet.
