Shillong, Rymphang 03: U Myntri Sorkar barim ka jylla u Bah Donkupar Massar hynne ka sngi ula leit ban thep kyrteng ban iakhun iaka elekshon MLA na Pynursla constituency kum u kyrtong shimet, ula ong ba ki paidbah ka Pynursla ki thrang dik dik ban don noh ka jingkylla.
Ula ong, ka elekshon hapoh ka Pynursla ka long kaba dait thah bha bad nga tharai ki paidbah ki kwah ban don noh ka jingkylla.
Ula ong, ha ka por jongka jingsaphriang ka khlam COVID-19, ki paidbah kila mad ia ka jingeh kaba khraw bad kim shym la ioh ia kano kano ka jingiarap bad ula ong ba ula don beit bad ki paidbah ka Pynursla bad u kyrmen skhem ba yn jop ia kane ka elekshon kaba mynta.
U Bah Don ym shim la treh ban kren ne kynthoh eiei ia ka rukom treikam jong ka sorkar MDA, hynrei ula ong pat, “Ngi la iohi lut ha ki youtube ia kiei kiei kiba jia, ai ba ki paidbah hi kin shim ia ka rai nalade ia kaei kaba ka sorkar kala leh. Ngam kwah ban ong eiei”
Haba kylli la kan don kano kano ka jingktah ia u ha ka jingiakhun iaka elekshon MLA namar ba u iakhun kum u kyrtong shimet katba ka kurim ka jong u ka Kong Grace Mary Kharpuri pat ka iakhun kum ka kyrtong ka NPP na Shella Constituency, ha kaba iadei bad kane, u Bah Don ula ong, katei kam shim la jia tang ha ka ïing ka jong u.
“Ngi la iohi ba ha kiwei ki jylla ruh, ki shi kurim ki iakhun halor ki ishu ki bapher bapher. Ha ka elekshon kaba la dep nga la iakhun na ka seng NPP katba ka kurim ka jong nga kala iakhun na ka seng PDF hynrei kaei kaba jia kadei ka kam shi ïing, ka neh hi hapoh ïing hapoh sem bad kaei kaba iadei bad ka kam politik ka mih shabar” ong u Bah Don.
Haba kylli balei ym shim la treh ban iakhun na ki seng sain pyrthei, une u Myntri sorkar barim ula ong, kam shong than ha ka uniphom hynrei ka shong ha u briew.
“Ngi hap ban vote ia u briew ym ia ka seng bad baroh kan shong beit ha ki paidbah” la pynkut u Bah Don.
