Shillong, Jymmang 26: Ka Tnad Health & Family Welfare ka Jylla, hynne ka sngi Nyngkong, kala lum ia ka jingialang bishar kam bad ka Medical Expert Committee (MEC) ban lum jingtip ia ka jingpynkhreh ka Jylla ia ka jingwan lynshop biang ka khlam Covid-19 haba iohi ia ka jingiohpang ki briew ha kylleng ka Ri.
Ia kane ka jingialang la pyniaid da u Principal Secretary bad Development Commissioner ka Tnad Health & Family Welfare Sampath Kumar hapoh ka kamra treikam jong u, kaba la wan iashimbynta da ki stad ka koit ka khiah bad ki nongmihkhmat na ki jaka sumar ka Sorkar bad ki riew shimet na kylleng ka Jylla.
Ka State surveillance officer, Integrated Disease Surveillance Programme (IDSP) ka Jylla kala ai ia ka jingbatai halor ka jing long jingman jong ka khlam Covid-19 ha Meghalaya naduh u snem 2020 haduh u Jymmang 2025, ka jingai injek tika haduh mynta bad ki jingpynkhreh ha ki jaka sumar ka Jylla.
La pynpaw ba haduh mynta ym pat don satia kano kano ka case Covid-19 ne don ki nongpang Covid-19 hapoh ka Jylla hynrei la pynpaw ia ka jingdonkam ban pynjur ia ka jingpeitngor lyngba ka jingleh ia ki test bad kiwei kiwei ki jingpynkhreh.
La bthah ruh ia baroh ki jaka sumar ka Sorkar bad ki riew shimet ba kin peit thuh bad pynkhreh lypa ia ki lad ai jingsumar ia ka jingpang Covid-19 ba kynthup ai ka jingbuh lypa ia ki oxygen, ki jingtei kiba donkam, ki kyndon ban khmih bad sumar ia ki nongpangSevere Acute Respiratory Infection (SARI), Influenza-like-IlIness (ILI) bad ka jingshitmet.
Nalor kane, la bthah ruh ba kin shim jingkhein biang ia ka jingdon ki dawai ba kongsan bad pynthikna ia ka jingtreikam jong ki testing centre ha baroh ki District.
U Principal Secretary ula kyntu ban shim ia ki lynti jingiada haba ban jur ia ka jinglong kongsan ban peitngor ia kiba pang ILI/SARI, shit met khamtam ha ki jaka ba iarung iamih bha ki briew kum ha Iew ha hat bad ki Ophis bad jaka pule ka Sorkar.
La bthah ia ki jaka sumar ba kin shongbishar ia ki kam ki jam bad ban pynthymmai ia ki Standard Operating Procedure (SoP) bad ban khmih biang ia ki kyndon kiba treikam bha na ka jingwan lynshop ka khlam Covid-19 bala dep.
 ban lum jingtip ia ka jingpynkhreh ka Jylla ia ka jingwan lynshop biang ka khlam Covid-19 haba iohi ia ka jingiohpang ki briew ha kylleng ka Ri.){kind=link}