Shillong Nailar 11: Ka KSU-EJHD kum shi bynta ban iakhun pyrshah ia u drok uba lah kynrei bha ha ka District bad ka jylla baroh kawei, hynne ka sngi Thohdieng kala shim ia ka sienjam ban mih shakhmat bad ruh ban iasnohkti bad ki bor District ha kaban rat dyngkhong ia une u jingdih uba sniew uba la ktah bha ia ki samla ka jylla.
Ka seng kala leit ai jingmut sha u Deputy Commissioner ka District ban shim ia ki lad ki lynti ban iada iaki heprit bad ruh ia ki samla na une u jingdih uba sniew, khamtam haba la iohi ba ka EJHD ka dei kawei naki District ba jur bha ka jingkynrei bad jingwan u drok.
Ha ka jingiakynduh, ki nongialam ka KSU kila ai jingmut ba dei ban pynlong ia ki Awareness Programme ha ki skul na ka bynta ki heprit bad ki samla khnang ba kin lah ban kiar na une u jingdih bad la ai jingmut ruh ruh ia u DC ba yn pynlong da ka jingialang bad baroh ki kynhun bapher bapher ban iamir jingmut halor kane ka mat.
Ka seng ka la ai jingmut ruh ba yn sdang noh iaki awareness program ha man la ki skul kiba don hapoh ka district ha ka por ba don iaki Assembly man la ka step bad ban leh iaki awareness program ha katei ka por bad ban pynkhlain shuh iaki bor pahara bad ruh ba ka Police Department kan iatrei ryngkat bad ki seng samla shnong, ki dorbar shnong bad kumta ter ter ban pynduh ia une u jingdih uba sniew.
Ki nongialam ka KSU kila pyntip ba u DC u la pdiang ia ka jingai jingmut ba yn iatreilang bad yn wad ia ki lad ki lynti kumno ban iada ia ki khun samla na une u jingdih.
Ka seng kan sa iakren ruh bad ki Dorbar Shnong bad ruh ban jied ia ki shnong ban wanrah iaka Community Gym kaba long shi bynta ka seinjam ha ka jingialeh ban iakhun ia une u jingdih bad kane ka seinjam kan iarap iaki khun samla ban pynleit jingmut ha ka kam kilan met bad ban pynklet iaki na ki jingsniew ba bun rukom.
Ka Seng kala ai jingmut ruh ban buh ki “deaddiction aftercare rehabilitation centre” bad ia kane iaka jaka, ka seng kan sa shimti ban wad jaka bad ruh ban pynsgewthuh sha ka shnong ki thaw ba kin pdiang.
Ka KSU-EJHD ka kyntu ruh ia ki paidbah ba kin iatreilang ryngkat bad ka sorkar lem bad ka seng ban lah rat dyngkhong ia une u jingdih ba sniew bad ruh ban ym khim jingmut ne tieng haba wan ka jingbha bad jingkylla bad ka kyntu ruh iaka sorkar ban pynleit jingmut lem halor kane ka mat bad ruh ban pynsted ha kaba pyntrei iaka Drug Reduction Elimination and Action Mission (DREAM) draft policy.
