Nongpoh, Jymmang 07: Kum shibynta ban nangpynroi ïaki kam jngohkai ha thain Ribhoi, ka Shnong Lawbyrwa Ri Bhoi District, mynta ka sngi ka la ïoh ban plie ïa kawei ka jaka jngohkai kaba la tip kum ka Lumkshaid Tourist Spot, kaba lah ban khring ïaki paidbah ban leit kai pyngngad ha katei ka jaka.
Kane ka jaka jngohkai jong ka shnong Lawbyrwa la pynwan dur bha da ki nongshong shnong jong ka Shnong Law Byrwa bad ïa ka jinglut jingsep la pynlut hi da ka Dorbar Shnong Lawbyrwa.
La khap ribon ia kane ka jaka jngohkai da u Arpit Upadhyay, Deputy Commissioner ka Ri Bhoi kum u kongsan ha ka jingïadon lang u Bah I Swer, Director ka tnat Basin Development, u Bah D Lyndem, Bah Garyland Sun, Block Coordinator, Bah Rijied Kharkhrang Rangbah Shnong ka Lawbyrwa, ki dkhot ka VO Lawbyrwa bad ki nongshong shnong.
U Rangbah Shnong ka Lawbyrwa Bah Rijied Kharkhrang, u la ïathuh ba ïa Kane ka jaka jngohkai la sdang naduh mynshem snem bad u pynpaw ïaka jongsngew nguh ïa baroh kiba la trei shitom ban pynurlong ïa kane ka kam haduh ba la lah ban plie noh mynta ka sngi.
U la ong ruh ka jingplie ïa Kane ka jaka jngohkai kan nym wan lam tang ïa ki nong jngohkai hynrei kan wanrah ruh ïaka jingïohkam ïoh jam jong ki khun samla bad kumjuh ïaki longkmie jong Kane ka shnong ynda ka la ïaid bha kane ka kam.
U Arpit Upadhay u la pynpaw ba ka jinglah jong ka shnong ban treishitom ban pynwandur ia kane ka jaka kawei pat ka jaka jngohkai pyrthei hapoh ka District kan long shisha kaban pynmyntoi ymtang ia ki nongwan jngohkai pyrthei hynrei kan plie ruh ia ka lad iohkam iohjam bad ruh ban kyntiew ia ka ioh ka shong hapoh ka shnong ka thaw.
U la iathuh ruh, ba kum ki bor pyniaid district ki don shibun ki lad ban ai jingiarap ban kyntiew ia ka kam jngohkai pyrthei lane tourism bad kaba kongsan ka long ka jingiatreilang jong ki bor pyniaid shnong kumno ban nang pynitynnad shuh shuh ia kane ka jaka, da kaba kyntu ruh ia ki nongshong shnong ba kin phikir bad ruh ban ri sumar bha ia kane ka jaka khamtam ban pynlait ia ka na ka jingjakhlia na ka jingbret pathar ia ki jaboh ki jabain.
