Shillong, Naiwieng 14 : Ki Nongtrei ASHA ka West Jaintia Hills, hynne ka sngi Ba-ar, kila pynlong ia ka rally ha Jowai ban pynbor ia ka Sorkar Jylla ba kan pynurlong noh ia ki mat jingdawa ki ASHA ba kynthup ia ka jingkyntiew ia ka bainong.
Kane ka rally kala sdang na Madan Tympang Iawmusiang bad la pynkut ha Madan Dai-Masi, Ladthalaboh da ka jingialang ba lyngkot.
Ki Nongtrei ASHA kila dawa ia ka Sorkar ban pynkiew noh ia ka bainong jong ki n aka T.2000 shibnai, kaba long tang T. 66 shisnem.
Lah ban kdew ba ki Nongtrei ASHA kila don mynta hapdeng ka jingiakhih da kaba sangeh treikam naduh ka 6 tarik Naiwieng.
Ka President ka Meghalaya ASHA Union kong M June Myrsing kala pyntip ba ka Myntri ka Koit ka Khiah Dr Ampareen Lyngdoh, kala kyrpad ia ki ASHA ba kin iasdang trei biang noh hynrei ka union kala kyntait ia kane ka jingkyrpad katba ka seng kam pat ioh ia ka jingkular na ka Sorkar halor ki jingdawa.
Kala ban jur ruh ba ka Tnad ka Koit ka Khiah kala pyntip sha ki lad pathai khubor ba ka Tnad kala dep pyllait T.34 klur sha ki ASHA ka Jylla hynrei ka ong ba kane ka jingiakhih ka dei jong u snem 2023.
Ka kong Myrsing kala pynbna ba ka jingiakhih kan dang iai bteng tad haduh bala pyntreikam ia ki mat jingdawa.
