Tang T.66 shisngi kumno ngin im? Buh jingkylli ki ASHA
Nongstoin, Naiwieng 13 : Ki Nongtrei Accredited Social Health Activists (ASHA) ka West Khasi Hills, kila iamih paidbah sha ka rally ha Nongstoin, ban pynbor ia ka Sorkar Jylla ba kan pynurlong noh ia ka jingdawa pynkiew noh ia ka jingsiew jong ki.
Kane ka rally kala sdang na Childrens Hospital bad la pynkut ha Market Complex, New Nongstoin, ha kaba da ki spah ngut ki ASHA na kylleng ki Shnong hapoh ka District kila poi ban pynsawa jam ia ki mat jingdawa sha ka Sorkar Jylla.
Haba pynpaw ia ka jingsngewkhia, ki Nongtrei ASHA kila bynniaw jur halor ka jingrit palat ka jingsiew ia ki, kaba long tang T. 66 shisngi lada khein ha ka shibnai. Kila buh jingkylli ba kumno kin im da kane ka jingsiew ia ka Sorkar Jylla.
Ha kane ka rally la wan iashimbynta ruh da ki Nongialam ka Meghalaya ASHA Workers Union ba kynthup ia ka President M June Myrsing, President ka ASHA Workers Union Nongstoin Linianci Marwein, President ka Mawshynrut ASHA Union Kyntienmon Nongshlu, u Sardar ka new Nongstoin Bah Srally Rashor bad ki Nongtrei ASHA na Aradonga.
Haba kren ha ka jingialang, ka Kong M June Myrsing kala pynpaw ia ka jingsngewsuh bad ka jingsngew lyngngoh halor ka jingkren ka Myntri ka Koit ka Khiah Kong Ampareen Lyngdoh haba iadei bad ka jingsiew bala ai sha ki Nongtrei ASHA.
Halor ka jingong ba ka samoi treikam ki ASHA ka long tang arsnem, katei ka nongialam ka MAWU ka la buh jingkylli ruh ia ka Myntri ka koit ka khuah da kaba ong “lada ka samoi trei kam jong ki ASHA ka dei tang ar snem, ka sorkar ka dei ban phah kloi kloi ia kita ki kyndon trei kam sha ka MAWU khnang ba kin tip ia ka jingshisha”.
Ka la ong ruh ba hadien ka jing iakhih jong ki ASHA ka Myntri ka la iakynduh ia u Myntri Rangbah ban ia kren halor ka jingdawa jong ki ASHA hynrei ka jubab kaba mih na katei ka jingiakynduh kam shym la pynhun satia ia ka jingkwah jong ki ASHA, kumta na ka liang jong ka Union ka la shim ia ka rai ba kin iai dawa na ka por sha ka por ba ka sorkar ba ka dei ban ai noh ia ka hok kat kum ka jingtrei jong ki ASHA.
