Nongpoh, Naiwieng 22: Da ki spah ngut ki nongshongshnong ki lai shnong ka Ri-Bhoi- ka Umpher 12 Mer, Amphanggre bad Matchokkgre ryngkat ka Joint Action Committee, kila mih paidbah ha ka sngi Thohdieng ban pynpaw ia ka jingpyr shah kaba jur ia ka jingthmu ka Sorkar Jylla ban pynkynriah ia ka Conservation Training Institure (CTI) ka Tnad Soil & Water Conservation sha Mawkhanu.
Lah ban kdew hangne ba ka Sorkar Jylla ka don ka jingthmu ban pynkylla noh ia ka jaka ba ieng ka CTI sha ka Industrial Estate.
Kine ki nongshongshnong kila pynlong ruh ia ka jingiaid paidbah kaba la sdang na ka shnong Umpher bad pynkut hakhmat ka Ophis ka CTI. Ha kane ka rally, ki nongialam kila kynnoh ba ka Sorkar kala shu shim rai sop sop khlem ka jingkynjoh ktien bad mynjur jong u paidbah.
Ia kane ka jingpyrshah la kyrshan da ki nongialam na ki Sengbhalang bapher bapher ba kynthup ia ka Khasi Students’ Union (KSU), FKJGP, RBYF, Byrnihat Citizens Forum, Garo Students Union (Ri-Bhoi Regional Unit), Byrnihat Women Society, bad ki samla pule na ka St. Jude Secondary School bad CTI.
Ki nongiakhih kila rah ia ki placard ba pynrem jur ia ka jingthmu jong ka Sorkar haba ban jur ba ki pyrshah ruh ban pynkylla ia ka jaka ba ieng ka CTI sha ka Industrial Estate.
Kila pynpaw ruh ba ki nongshongshnong ka thain kim kwah satia ban nang ring mynsiem da ka lyer ba nang jaboh shuh shuh khamtam ba ka Byrnihat ka dei kaba la ioh ia ka jingithuh kum ka jaka ba jaboh tam ka lyer ha ri India.
Ki nongialam kila kynthoh ba ka jingpynkylla ia ka jaka ka CTI sha ka Industrial Estate kan ktah jur ruh ia palat 3000 ngut ki nongshongshnong kiba shaniah ia ka khlaw ba marjan ban ioh ia ka umbam umdih nalor ka jingktah ia ka mariang bad ka jingkhuid jong ka thain.
Hadien kane ka rally, kine ki lai shnong kila iashong jingialang bad ki nongialam ka JAC lem bad ki Sengbhalang ban iakren sani ia kane ka kam. Kane ka jingialang kala rai ban sa leit aiti da ka dorkhas sha ki bor Sorkar ban pynpaw ia ka jingpyrshah ban pynkynriah ia ka CTI.
