Guwahati, Jymmang 15: Ka kynhun ba palat 500 ngut ki samla na kylleng ki bynta jong ka Arunachal Pradesh kila iamih ban duwai ia ka jingsuk bad jing iamap markylliang ha Manipur ha ka jingialang hapoh ka Divine Renewal Retreat Centre, Margherita, Assam hynnin ka sngi U Blei.
Haba ialam ia ka jingiathang mombiti na ka bynta ka jingsuk, u Bishop George Pallipparambil ka Miao diocese ula kyntu ia ki samla ban long ki nongrah khubor ka jingsuk bad jingiamap markylliang.
“Kaei kaba ngi iohi ha Manipur kam don jingiapher eh bad kaei kaba jia ha Ukraine. Ha kane ka jingjia ba sngewsih ngi donkam ban ieng lang kawei bad pynsaphriang ia ka khubor ka jingsuk ha kylleng ka Manipur bad ha ka thain”, ong u Chairman Bishop ka Youth Commission ka North East India Regional Bishops’ Council.
Ka jingiakynad ha Manipur kaba la sdang naduh ka 3 tarik Jymmang, kala shim haduh 70 ngut ki mynsiem briew bad palat 200 ngut kila mynsaw jut bad kat kum ka jingkhein ka sorkar ki don haduh 30000 ki briew kila kylla phetwir.
Hadien ka jingshong riehtngen ha ki jaka sah shipor ki shipai, kiba bun kila mih na Jylla ban phet sha ki jaka ba shngain ha kylleng ki bynta ka ri.
Haba kren ha ka jingialang duwai, u Taw Tebin, President ka Arunachal Pradesh Catholic Association (APCA), ula ong ia ki samla ” nga kyrpad ia phi iwei pa iwei ban peit bad sngap bha ha kaban iada ialade na ki bor pyniapait iapra kiba la trei borbah ban pyniapait iapra na ka jingiapher jaidbynriew bad iapher niam ha ka Jylla jong ngi”
Haduh 60% na ka 30 lak ka jingdon briew ha Manipur ki dei ki Meitei kiba dei ki Hindu katba bun ki paid riewlum ki dei ki Khristan bad kine ki dei ki Kuki bad Naga kaba long kumba 40% eiei.
Ka jingiakynad ma Manipur kala ktah ruh wat sha ka jingngeit niam ha kaba bun ki jaka mane Blei ki Khristan kiba dei jong ki Kuli bad Naga kila shah wiang ding.
Kat kum ka kaiphod jong ka Archdiocese ka Imphal halor ka jingshah pynjulor ka
St. Paul’s Parish bad Pastoral Training Centre bad kj Iingmane bad Nongkynti tang ha Imphal kala kot ia ka T. 9 klur.
