Shillong, Iaiong 15 : Ka long ka khubor ba pynkyndit bad ba pyni ia ka jingshyrkhei ka Cyber-Crime kaba pyni ia ka jingbym long shngain shuh mano mano ruh, ki runar kila mih ban pyndonkam bakla wat ia ka kyrteng jong u Myntri Sorkar tang ban ioh pynngop bad dawa pisa na u paidbah.
Kane ka jingjia kala jia ia u Myntri ka Tnad Public Health Engineering (PHE) Marcuise N Marak ha kaba ki runar kila shna ia ka social media thok ha ka kyrteng jong u ban ioh pan pisa bad ki jingtip shimet na ki paralok bad ki nongbud jong u Myntri.
Kane ka la paw pyrthei hadien ba u Myntri dalade ula thoh ha ka Facebook Page jong u halor kane ka jingjia hynnin ka janmiet, bad kyntu ia ki briew ba kim dei ban phah pisa ne ai ia ki jingtip shimet lada pan da kine ki runar ha ka kyrteng jong u.
“Nga la lap dang shen ba don ki briew kiba la shna ia ka Account Instagram bad Facebook thok ha ka kyrteng jong nga. Kine ki briew kila ak kumba dei ma nga, kila pan jingtip ba shimet bad wat ia ka pisa. Sngewkhia shim ba kano kano ka Account lait naka Instagram bad Facebook account jong nga hi, baroh ki long kiba thok” ong u Myntri ha Facebook.
U Myntri ula kyntu ruh ia baroh ba kin pynlut por bad kine ki social media account thok bala thaw ha ka kyrteng jong u bad ban tip lada don kino kino ki jingsuba sha ki bor ba dei khmih. “Sngewbha tip ba nga la shimkhia bha ia kane ka kam, bad nga la bthah ia ka kynhun jong nga ban mudui da ka ejahar sha ki Pulit pyrshah ia kine ki runar” ula pyntip.
U Khun jong u Myntri u Tengrik M Sangma, ruh ula ujor da ka ejahar sha ki Pulit ka Sadar Police Station ha Shillong ba iadei bad kane ka kam haba kyntu ban leh eiei mardor.
Ha ka ejahar, u Tengrik ula ong “Nga la thok ia kane ka jingujor ba iadei bad ka jingshna ia artylli ki social media account thok ha Facebook bad Instagram, ha ka kyrteng u Kpa jong ngam u Marcuise N Marak. Une u briew (ki) ba donkti ha lyndet kane, kila pyndonkam ia ka kyrteng u Kpa ban dawa pisa bad ia ki jingtip shimet na kiba bun ki briew, kaba long ym tang kaba beain hynrei kaba thmu sniew bad pynjahburom”.
“Kum u Myntri Sorkar,ka burom ka ijot jong u Kpa jong nga ka long kaba kongsan bha bad kum kine ki kam shukor yn ym lah satia ban shu sngap. Nga kyntu ia phi ban leh eiei mardor bad ban pynlong ia ka jingtohkit halor kane ka kam. Sngewbha shim ia ki sienjam ba dei ban shim ha kaban weng noh ia kine ki social media account thok bad ban leh eiei kat kum ka ain ia ki briew ba donkti” ula ong.
