Shillong, Naiwieng 25 : Ka Nongkrem Youth Development Association (NYDA) kala mih shakhmat ban shim ia ka lyngkor ha kaban ialap pyrshah ia u droks bad ki jingsniew kiba mih na une u jingdih buaid ha Nongkrem.
Kane ka Seng kala pynglong dang shen ia ka jingialang pynsngewthuh paidbah ba 7 sngi lynter, shaphang u droks bad ki jingdih pynbuaid ha ryngkat ka jingiatreilang bad ka Nehru Yuva Kendra Sangathan, East Khasi Hills, Shillong.
Ia kane ka prokram la pynlong ha Youth Cultural Centre cum Communital Hall, Iewpyrsing, Nongkrem naduh ka 22 tarik naiwieng bad kan kut haduh ka 29 tarik Naiwieng-kaba la pynlong halor ka phang “Awareness & Education Programme on Drus Addiction & Substance Abuse”.
Ia kane ka prokram la pyniaid da u President ka NYDA Bah Wanlang Mylliemngap bad la plie ia ka da u Deputy Director ka Nehru Yuva Kendra Sangathan Bah D Rapsang.
Ki Nongai jingkren ha kane ka prokram ki kynthup ia i Kong. M. Wahlang, Counsellor New Hope De-Addiction Centre, Bah Shanskhem Marbaniang na ka Khasi Jaintia Presbyterian Synod Sepngi Urban Mission, Kong. Medalin Lyngdoh na ka Next Space Organisation, Dr. J.K. Henry bad kiwei kiwei.
Ki Nongkren ki la ai ka jingbatai kaba bniah ha kaba iadei bad ki jingsniew kiba shyrkhei kiba ka imlang sahlang ka ia kynduh da ka jingkynrei ka jingpyndonkam ia u drok bad kaba lam ruh sha kiwei pat ki jingsniew kum ka HIV bad ka jingpang AIDS.
Ki nongiashim bynta ha kane ka programme ki long ki khynnah skul na ka Salem Higher Secondary School, ka Nongkrem Higher Secondary School, ka Pahsyntiew Memorial Secondary School, ki Bachelor of Social Work na Women’s College Shillong, Martin Luther Christian University, IIPS, ki dkhot jong ki Seng Samla bapher bapher bad kumjuh ruh ki dkhot jong ka seng. Ha kane ka programme ka seng NYDA kan ioh ruh ban leit ia ka Door to Door Campaign halor kane ka phang.
Ka NYDA ha kajuh ka por, ka kyntu ia baroh ki paralok parajor, ki marjan marpa ba kin sngewbha ban shim khia ban ialeh ban pynduh ia kine ki jingsniew kiba la ioh ban suhthied ha ka imlang sahlang kaba lah ruh ban ktah ia ka pateng ka ban sa wan.
 kala mih shakhmat ban shim ia ka lyngkor ha kaban ialap pyrshah ia u droks bad ki jingsniew kiba mih na une u jingdih buaid ha Nongkrem.){kind=link}