Shillong,Naitung 29 : Ka kam pahara ha khappud India-Bangladesh ka dei ka mat kaba ju mih bha ki jingkynthoh namar ka jinglong laitlan ka khappud bad ka jingioh rung katba mon ki nong Bangladesh sha India, la ka dei ha Meghalaya, Tripura ne na Assam.
Dang shen, kawei ka video jong u YouTuber Diwar Hussain kala saphriang paidbah bad pynmih ia ka jingiatai kaba khluid bha namar ka jingpyni ia ka jingsuk ban jam ia ka khappud India-Bangladesh.
Ka video balathep ha ka YouTube Channel jong u, ka pyni ba katno ka suk ia u briew bam jam sha shiliang ka khappud ka Meghalaya khlem da mad ia kano kano ka jingeh ne jingwit. Ula kynthoh ruh ba haduh katno ka suk palat ba jam ia u pid namar ym don satia ki shipai BSF ki ban khang ia u.
Kane ka video kala pynbitar ia kiba bun ki nongshongshnong ka India kiba la buh jingkylli halor ka jingtrei hok jong ki shipai BSF ban iada iala u pud u sam bad ia ka jingshongshngain ka Ri.
Haba kynthoh ia kane, ki shipai BSF kila kyntait ban pdiang ia kane ka video da kaba ong b aka dei kaba ialam bakla bad ka dei ruh tang ka jingpyrshang ban pynpaw nam ialade.
Ki shipai kila pynshai ba kane ka video ka dei kaba la shna naduh u Lber 2023 hynrei la thep biang bad pyni ia ka jinglong jingman ba mynta ha ki jaka khappud ka Bangladesh.Ki BSF kila ong ba une u nongleh social media ula shu pynman hi ia kiei kiei baroh na kane ka video khlem da sngewthuh ia ka rukom treikam jong ki bor pahara ha khappud.
“Kum kine ki video ba thep ha social media da ka jingthmu ban ioh ia ki nongbud (followers) bad bna nam, kam dei ia kaban taplup ia ki jingpyrshang trei hok bad ki jingjop kiba ki BSF kila lah ha kaban khanglad ia ki kam bymman ha ki jaka khappud” ong u IG ka BSF Meghalaya.
Ula kyntu ia ki paidbah ba ki lad pathai khubor ba kin phikir bad da pynshisha bha hashuwa ba kin pynsangeh ia ki jingtip kiba lah ban ktah bad pynthohbria ia ka nam ka burom jong ki bor pahara.
Nalor kane, kala mih ruh sa kawei ka video bala saphriang paidbah, kaba pyni ia ki nong Bangladesh kiba wan rung sha India ha ka thain Dawki ban khlong maw. Ha kawei pat ka jingjia ba ku kane, kawei ka video kala ioh ring ia ki nong Bangladesh kiba kawang maw ia ki nongshangkai pyrthei ka ri India ha Dawki.
Kine ki jingjia kila nang pynartatien ia ka jingtreikam ki BSF ha kaba bun kila buh jingkylli la ka dei shisha kaba suk ban jam ia u pud u sam ka India-Bangladesh.
