Shillong, Nailur 25 : Ki Dkhot ka Liang Pyrshah ka Khasi Hills Autonomous District Council (KHADC), kila mih jyndat hynne ka sngi Nyngkong naka Dorbar Kyrpang jong ka Concil ban pyrshah ia ka Elaka Administration Amendment Bill, 2023.
Ki Dkhot ka Liang Pyrshah ki kynthup ia ka United Democratic Party (UDP) bad ka Hills State People’s Democratic Party (HSPDP).
Kane ka jingpyrshah kala mih na ka rai jong ka Executive Committee ba ialam da ka NPP, ha ryngkat ka Congress, ba kan pyniaid shakhmat ha kaban wanrah bad mynjur ia ka Eleka Administration Amendment Bill, 2023.
Ka Liang Pyrshah kala kyntu ia ka EC ban sangeh na ka jingmynjur kyrkieh ia kane ka Bill haba ai jingmut ba dei ban phah shuwa sha ka Select Committee ba kan shong bishar, haba kdew ia bun ki kyndon ba iatakhuh haba pyniaid ia ki Hima.
Hynrei, ka EC kala rai ban wanrah beit ia kane ka Bill, kaba pynbor ia ka Liang Pyrshah ban mih jyndat noh napoh ka Iing.
