Shillong, Naiwieng 10 : “Hato ka jingiakhih paidbah ka dei kaba la khein beain ha Jylla Meghalaya ? Hato ngi im ha ka ri synshar paidbah ne ha ka synshar donbor ? –ka dei ka dak jingkylli bala pynpaw lyngba ka placard ha ka jingiakhih ba kynsan kynsan jong ka seng Hynniewtrep Youth Council (HYC) hynne ka sngi palei ha Nongbah Shillong.
Kane ka jingiakhih ka long pyrshah ia ka jingthombor jong ki Pulit ia ki dkhot ka HYC, kiba la iakhih jai jai halor ka jingbym lah jong ka Sorkar ban pyntreikam ia ki khyndai tylli ki mar jingdawa kynthup ka ILP ha Rambrai, West Khasi Hills District hynnin ka sngi Balang bad ka jingpynjari ia ka kyndon 144 CrPC kaba khang ia ka jingialum palat 5 sngi ki briew ha baroh ki jaka jong ka Nongbah Shillong.
Ki Dkhot ka HYC kila ialum paidbah hakhmat u mot U Kiang Nongbah hajan Civil Hospital bad sdang pyrta ia ki slogan bad rah placard ba pynrem ia ka jingpynibor jong ki Pulit, kaba lam sha ka jingmynsaw haduh 3 ngut ki dkhot.
Haba iakren bad ki nongthoh khubor, u General Secretary ka HYC Samla Roykupar Synrem ula ong ba ka HYC ka pynrem jur ia ka jingpyni bor jong ki Pulit ha Rambrai. Ula ong ba ki dkhot jong ka Rambrai Circle kum shibynta jong ka “Save Hynniewtrep Mission” kila rah placard ia ka jingwan iuhkjat jong u Myntri Rangbah Conrad K Sangma ba buh jingkylli ia kaei kaba jia ia ki khyndai tylli ki mat jingdawa bala buh hakhmat ka Sorkar.
Hynrei haba ki dkhot kila poi ha ka jaka ba u Myntri Rangbah u dei ban iaid lynti ban plie ia ka Rambrai C&RD Block, ki Pulit kila knieh ia baroh ki placard jong ka seng bad ha ka jingiakhru, lai ngut ki dkhot kila mynsaw.
“Namar kata, ngi la wan ban iakhih ban phah ia ka khubor sha ka Sorkar ba ka HYC kan ym riej da kine ki jingle ki Pulit bad ki Magistrate lane ka Sorkar namar ngin ym sngap jar halor ka jingdawa ia ka hok jong ki paidbah” ong u samla Roykupar.
Haba pynpaw ba ka HYC kan nang pynjur ia ka jingiakhih, une u General Secretary ula ong “Ka jingpynjari ia ka 144 CrPC kan ym khang ia ngi ban pynlong ia kine ki jingiakhih ha Shillong naduh mynta ka sngi bad ha kine ki sngi ban wan, kum kine ki jingiakhih kin nang iai jia tad haduh ba ka Sorkar kala shimkhia ia ki jingdawa jong ngi bad ia kaei kaba ngi dawa ba ka dei ban pyntreikam kham kloi kat kaba lah”.
Ka jingpynrung ia ka ktien Khasi ha ka khyrnit ba phra jong ka Riti Synshar ka Ri, ka jingpynkynriah ia ka Them Metor na Them Iew Mawlong, ban leh eiei halor ka jingbym iohkam iohkam ki samla ki dei katto katne na ki jingdawa hapoh ka Save Hynniewtrep Mission.
