Tura, Nailur 04 : Da ki hajar ngut ki briew kila iashimbynta ha ka rally jingsuk bala pynlong da ki nongtrei ka GHADC- ka Non Gazetted Employees Association, bala kyrshan da ki Sengbhalang bad ki kynhun bapher bapher, kaba la pynlong ha ka sngi Palei ha Tura.
Ia kane ka rally la pynlong na ka bynta ban pynbor ia ki bor khmih ba kin pyllait noh ia ka tulop jong ki Nongtrei, kaba la pynsah la bun phew bnai.
Ki Nongiashimbynta ki kynthup ia ki Nongtrei ka GHADC, ki MDC ka Liang Pyrshah, ki Nokma bad ki samla pule na ki skul bad ki College, kaba pyni ia ka jingnang bitar halor ki jingeh kiba mih na ka jingkyrduh pisa hapoh ka Council.
Kane ka rally kala sdang na Ophis ka GHADC ha William Point bad kala iaid lyngba ka Ringrey, ka District Maternity & Child Hospital, Babupara, Tura Bazaar bad Hawakhana, hashuwa ban pynkut biang ha phyllaw ha GHADC.
Ki nongiaid rally kila rah lang ia ki placard bad pyrta slogan ba daw aba siew noh mar mar ia ka tulop haba tynrong ia ka jingkitkhlieh ha ka Executive Committee ka GHADC bad ka Sorkar Jylla halor kine kiei kiei baroh.
Ki nongpyniaid ia ka rally kila pyntip ba kane ka jingiakhih kan dang iai bteng tad haduh bala pynurlong ia ki jingdawa jong ki.
