Shillong, Lber 22 : Ka kyrteng u ‘Sanbor Pala’ kala wan mih paw biang kum u snar pynbthei bomb IED jong ka seng Hynniewtrep National Liberation Council (HNLC), hadien ka jingiap jong u General Secretary barim Bah Cheristerfield Thangkhiew ia uba ki Pulit ki pynman ba u treikam ha ka syrngiew u ‘Sanbor Pala’ ban pynbthei bomb ha Jylla.
Kane ka kyrteng u ‘Sanbor Pala’ kala mih paw lyngba ka video bala pyllait da ki Pulit ka Ri-Bhoi District hynnin ka sngi Palei, kaba record ia ka jingiakren phone hapdeng uwei u military commander ka HNLC Bah Sanbor Pala bad wei na kiba hakhmat eh ha ka jingioh kurup bomb IED ha Ri-Bhoi.
Kane ka jingmih kyrteng biang u Sanbor Pala ha kane ka case kala pynshaiong ia kiba bun balang.
Lah ban pynkynmaw ba ha ka kaiphod jingtohkit jong u Justice T Vaipher bala pyllait paidbah ha u Jymmang 2022, kala kdew ba u General Secretary barim ka HNLC Cheristerfield Thangkhiew ula leh ia ki kam pyntriem kynthup ka jingpynbthei bomb IED bad dawa pisa ha ka kyrteng u ‘Sanbor Pala’ hashuwa ba un shah siat iap ha ki Pulit hala ka jong ka Iingsah ha Mawlai Kynton Massar.
Kat kum ka kaiphod, hapdeng u snem 2020 bad 2021, lai tylli ki jingpynbthei bomb IED la pynbthei da ka HNLC ha East Jaintia Hills District. Kine ki kynthup ia ka jingpynbthei bomb IED ha ka 26 tarik Naiwieng 2020 kaba jia ha Iew Soo Kilo, ka jingbthei IED ha karkhana Star Cement ha ka 12 tarik Rymphang 2020 ha Lumshnong bad ka jingthmu pynbthei bomb ha Meghalaya Coke factory ha Bther myn ha ka 17 tarik Kyllalyngkot 2021, kaba la pulom.
Kat kum ka kaiphod, ha ka jingtohkit jong ki Pulit ia kine ki lai tylli ki jingjia pynbthei bomb hapdeng u bnai Naitung bad Nailar 2021, kala don ruh shibun ki jingsam shithi dawa pisa na ka HNLC.
“Ha ka jingiaid ka jingtohkit ia kine ki jingdawa pisa, ki ejahar, la sei madan ia ki sakhi ha ki sdang taiew jong u nailar 2021 ba u Bah Cheristerfield Thangkhiew ula treikam sopsop kum u nongialam ka HNLC ha ka kyrteng jong u Sanbor Pala bad ula dawa pisa ruh ban bei tyngka ia ki kam jong ka HNLC ha ka dur jong ka jingpynbthei bomb IED bad kiwei kiwei” ong ka kaiphod.
“Kumta, ha ka 7 tarik Nailar 2021, la shai kdar ha ka sien ba nyngkong ia ka Special Investigation Team (SIT) ba u briew ha lyndet kine ki jingpynbthei bomb IED ba dang tohkit bad baroh ki shithi dawa pisa ki dei kiba la leh ym da mano mano ruh hynrei dei u Bah Cheristerfield Thangkhiew uba treikam ha ka syrngiew u Sanbor Pala bad pyndonkam ruh ia kajuh ka phone nombor na Bangladesh bad ka don ka jingsuba kaba jur ba u Bah Cheristerfield ula treikam ha ka kyrteng u Sanbor Pala hadien ka jingwan phai sha ka imlang sahang da kaba shu shongthait na ki kam ka HNLC” ong ka kaiphod.
