Guwahati, Lber 07 : Ha kawei pat ka jingjia kaba pynher syrngiew, uwei u samla uba dei napoh Lumding, Assam la lap ba u la shah pyniap da kaba mait ar lyngkhot ha ki bynta jong ka Gorakhpur ha Uttar Pradesh, ong ka khubor.
Ki khubor ki iathuh ba une u samla u la phone ia la ka jong ka kmie da kaba ong; “Mei sngewbha iarap ia nga, kin sa pyniap ia nga.Ngan ym lah ban iohi shuh ia phi sa shisien pat.Sngewbha iarap ia nga Mei.”
Ia une u lanot la tip kyrteng kum u Turan De ia uba la shah pyniap da kaba shah mait ar lyngkhot ha ka lynti rel ha Gorakhpur hapoh Uttar Pradesh.U Tutan De u dei uba trei kum u nong pynbeit ia ki jain ki nep hapoh ki kamra AC jong ka rel.
Kiba haiing hasem jong une u lanot ki la suba ba u Tutan u la shah pyniap hapoh ka rel bad ia ka met jong u la pynhap noh hapoh ka lynti rel ha Gorakhpur Station.
Hashwa ba un sa shah pyniap, u Tutan u la phone ia la ka jong ka kmie bad pyntip ba un sa shah pyniap.U la ong ba ka la don ka jingiasylla da ki suba kumno ban pyniap ia u.U la kam ruh ba un sa shah pyniap noh ha ka miet sngi Saitjain ba la dep.
Watla ha kaba sdang na ka ling kiba haiing kim shym la don ka jingngeit bad nang tharai ba ka dei tang ka jingsheptieng, hynrei ha kaba khatduh na ka liang kiba haiing hasem ki la ioh pdiang ia ka khubor halor ka jingiap ka jong u.
“U Kurim jong Nga u Turan De u la mih na Lumding ha ka jan miet jong ka 1 tarik mynta u bnai na Lumding shapoh Dibrugarh station.U trei kum u nongpynbiang ia ki jain ki nep hapoh ki kamra AC jong ka rel bad kumta na ka liang u manager u la phone ia u ba u donkam ban leit sha Gorakhpur da ka rel kaba kyrpang na ka bynta ki kam.U la mih ban leit sha Gorakhpur ha ka 2 tarik mynta u bnai.U la phone ha katei ka miet kumba u ju leh barabor bad ong ia nga ba nga la dep bam ja.Hynrei ha ka sngi kaba bud kynsan u la phone sha iing bad la sngewthuh ba u don hapdeng ka jingsyier.U la ong ba um nang iohthiah baroh shimiet.U la ong ba un ym im.Kumta ruh u la kyrpad ban kren iala ka jong ka kmie.Ka kiaw jong nga hadien ba kala shim ia ka phone bad kyntu kaei kaba la jia bad balei ba u sngewtieng? ka jubab ka long ba ki briew kiba don hapoh ka rel ki la iasylla ban pyniap ia u.Ki jingleh ki jong ki ki la pynpaw ia ki dak ba kila pynkhreh ban pyndep noh ia u, kumta u la iam pangnud,” ong ka kurim jong une u lanot.
Ha kawei pat ka bynta na ka liang ki bor pulit ki la pynlong ia ka jingtohkit halor kane ka jingjia khnang ban ioh kem ia ki runar kiba donkti.
