Shillong, Risaw 07: Ka West Jaintia District Sports Association, Shillong Sports Association, Nongstoin District Sports Association bad ka Ri-Bhoi District Sports Association kila ioh rung sha ka Semi Final jong ka U-14 bad U-16 jongka Meghalaya Youth League 2024.
Ia ka Quarter Final jong ka U-14 la pynlong ha madan jongka MFA ha Polo, katba ia ka U-16 la pynlong ha Sports Authority of India Centre kaba don ha NEHU.
Ia ka jingiakhun iaka Quarter Final kaba nyngkong la pynlong ha ka sngi Saitjain katba iaka jingiakhun ia ki Quarter Final ka baar la pynlong hynne ka sngi Nyngkong.
Ka jingiakhun ha ka sngi Saitjain, ka West Jaintia kala pynrem ia ka Pyndengumiong District Sports Association ha ka tie Breaker da 5-4 ha ka U-14 thadien ba kine ki ar tylli ki kynhun kila iakhaid da 2-2.
Ha ka U-16 ka West Jaintia kala jop da 5-0 ia ka Pyndengumiong, ha kaba u Dangkermi-oo Ryngkhlem ula ioh ia ka hat-trick.
Ha ka U-14, ka SSA Boys, kala jop da 15-0 ia ka Tura District Football Association ha kaba u Damebantei Kharkongor ula ioh thep 4 kol. Katba ha ka U-16 ka SSA kala jop ia ka Williamnagar District Sports Association da 2-0.
Hynne ka sngi, ka Ri-Bhoi kala pynrem ia ka North Garo Hills District Sports Association ha ka U-14 bad U-16 da kaba pynrem da 6-0 bad ha ka U-16 ruh kala pynrem da 5-2.
Hadien katei kala don ka jingiakhun hapdeng ka Nongstoin pyrshah ia ka Amlarem Block Sports Association bad ha ka jingiakhun ha ka U-14 ka Nongstoin kala jop da 3-2 ia ka Amlarem ha ka Extra Time hadien ba kila iakhaid da kaba thep mar 2 kol.
U Shosstar John Sangriang ula ioh thep ia ka kol ha ka Extra Time ban pynlong syndon ia ka Nongstoin ban khur ia ka jingjop.
Ha ka U-16, ka Amlarem kala ioh thep ia ka kol kaba sted tam ha kane ka lympung ialehkai tang da ki katto katne sekhon mar ia sdang ka jingiakhun lyngba u Emrickson Khonglah hynrei ka Nongstoin kala lah ban iakhun tyngeh bad jop da 3-1.
Ka Semi Final jong ka U-14 kan long ha ka sngi Balang ha Polo, ha kaba ka West Jaintia kan iakhun pyrshah ia ka SSA ha ka por 10:30 mynstep bad hadien kane, ka Ri-Bhoi kan iakhun pyrshah iaka Nongstoin ha ka por 1 baje mynsngi.
Ha ka U-16 ka SSA kan iakhun pyrshah iaka West Jaintia ha ka por 10 baje mynstep ha SAI, Shillong bad ha ka por 12:30 mynsngi ka Ri-Bhoi kan iakhun pyrshah ia ka Nongstoin.
Ia ki Final yn pynlong ha ka sngi Thohdieng.
