Shillong Jylliew 05: Ka Mawlai kan iakhun pyrshah iaka Khliehmawlieh Youth Club, katba ka Rangdajied United kan iakhun pyrshah iaka Shillong Lajong ha ka semi phainal jongka Meghalaya State League 2023 bad ia kane ka jingpynkhalai nusib la pyndep hynne ka lah sngi u Blei.
Ka jingpynlomng ia ka Semi Final kan long arsien kata ka ‘Home’ bad ‘Away’ bad ka jingiakhun kaba nyngkong kan sdang haka 10 tarik mynta u bnai katba iaka jingiakhun ka baar kan long haka 13 tarik mynta u bnai bad ia ka phainal yn pynlong haka 17 tarik u Jylliew ha Madan First Ground, Polo, Shillong.
Ia kane ka jingpynkhalai nusib la pynlong ha ka jingdonlang jong ki 4 ngut ki nongshah khot sngewbha kiba dei ki nongialehkai Football ba paw ka jylla kiba kynthup ia u Bah Redeem Tlang, Aiban Dohling, Halen Nongtdu bad u FIFA Assistant Referee Ri-iohlang Dhar.
La iadonlang ruh u MSL Tournament Director Bah Wanshanbor Kharkrang bad ki nongmihkhmat jong kitei ki 4 tylli ki kynhun.
Kane kadei ka sien kaba nyngkong ba ka Mawlai kala iashimbynta haka MSL bad haduh mynta kila ialehkai bha da kaba jop baroh 5 tylli ki jingiakhun haka Group A.
Ka Rangdajied kala long ka lahduh ha ka Group B bad kan iakhun pyrshah iaka SLFC kaba long ka lahduh jongka Group C watla ka dang sah sa ia kawei ka jingiakhun lashai ka sngi.
Ka jingiakhun hapdeng ka Rangdajied pyrshah iaka Lajong kan long kum ka jingialehkai biang ha ka phainal jong ka MSL ha u 2019 ha Khliehriat, ha kaba ka
Lajong kala jop da ka jingshut penalty.
Ka Khliehmawlieh kadei ka kynhun ba marwei ka bym shim la mih na ka nongbah Shillong bad kane ka kynhun kala long kaba la pynkhreh ban ialehkai bha ha ka MSL 2023.
Ha kawei pat ka liang ha ka jingialehkai kaba khatduh haka Group D ha Chandmari Ground, Tura ka Chipakkore kala pynliem da 9-2 kol iaka Wa’sa FC bad ha ka Group C ha MDSA Ground, Mawkyrwat, ka Mawten kala pynrem iaka Lumdiengngan da 3-0 kol.
Ka Wasa kala ioh thep nyngkong haka minit kaba 8 lyngba u Gilseng Momin, hynrei hadien kane ka Chipakkore kala ialehkai bha bad u Balkan Marak ula ioh ban thep haduh 4 kol kata ha ka minit kaba 18, 47, 63 bad 65.
Nalor kane u Harlee K Marak ula ioh ban thep kol ha ka 13 bad 84 minit katba u Ranggira R Marak ula thep kol ha ka minit kaba 80 bad 90 bad u Johnfield A Sangma ula thep ia ka kol haka minit kaba 47.
Ka Wasa kala ioh ban thep ia ka kol ka baar haka minit kaba 62 lyngba u Threesbirth Momin.
Katba ha Mawkyrwat, ka Mawten kala ioh thep 3 kol pyrshah ia ka Lumdiengngan lyngba u Reinjoywell Wasrde ha ka 31 minit, u Lastbornson Marwein haka 60 minit bad u Iaidborlang Thongni ha ka minit kaba 90+1.
Ka jingiakhun haka Sngi Baar, kan long hapdeng ka Shillong Lajong kaba la rung lypa sha ka semi phainal pyrshah ia ka Riangdo ha ka Group C kaban long ha ka por 3 baje mynsngi ha Mawkyrwat.
