Shillong, Jymmang 24: Ka Nongbat ia ka nam lahduh jong ka Meghalaya State League, ka Shillong Lajong, kala sdang iaka jingiakhun ha kane ka aiom ba mynta da ka jingjop ha ka jingialeh ba nyngkong da ka jinglah ban pynrem ia ka Lumdiengngan da 10-0 haka Group C kaba long ha madan MDSA ha Mawkyrwat, hynne ka sngi Balang.
Ha kawei pat ka jingiakhun, ka Langsning kala pynrem iaka Umrit da 9-1 ha ka Group A kaba la long ha MFA Turf, Shillong, katba haka jingiakhun kaba la long ha nongbah Jowai, ka Ladthadlaboh kala long ka lahduh haka Group B da kaba pynliem iaka Mulait United da 2-0.
Katba ha ka jingiakhun ha Tura haka Group D, ka Khliehmawlieh Youth Club bad ka Selsella Sports Association kila iakhaid da kaba ioh thep mar 2 kol ha ka jingialehkai kaba la long ha Chandmari Ground.
Ha ka jingiakhun hapdeng ka Lajong bad ka Lumdiengngan, u Babysunday Marngar jong ka Lajong ula ioh thep 5 kol kata ha ka 25′, 31′, 42′, 46′ bad 49 minit katba u Wadajied Kynsai Ryngkhlem ula ioh thep kol haka minit kaba 4, u Pynche Tyngkan ha ka minit kaba 16, u Atlanson Kharmaw ula thep ha ka minit kaba 70, u Ioanis Suchen ula thep ha ka minit kaba 77 bad u Hardy Cliff Nongbri ula thep haka minit kaba 90+2.
Ka Langsning ruh kala thep bun kol pyrshah iaka Umrit ha kaba u Dauruhipaia Pale ula ioh iaka Hat-Trick da kaba thep iaka kol haka minit kaba 3, 45 bad 87, katba u Arnesius Marwein ha ka minit kaba 5, u Kordor Dkhar ha ka minit kaba 12 bad 42 bad u Kynsaibor Lhuid ula thep ha ka 24 minit bad u Federick Wahlang ha ka minit kaba 52 katba ka Umrit kala ioh thep shi kol lyngba u Wanroyshang Sangma ha ka minit kaba 68.
Ha Jowai u Stephanson Pale jong ka Ladthadlaboh ula ioh thep iaka kol ha ka minit kaba 40 lyngba ka penalty bad mar ia sdang ka wat ka baar, na ka jingbakla jong u nongapkol ka Mulait, u Nickyboy Swer jong ka Ladthadlaboh ula ioh ban thep ia ka kol.
Ha ka jingiakhun ha Tura, u Maldrin Marak jong ka Selsella Sports Association ula ioh thep 2 kol ha ka minit kaba 4 bad 45, katba u Kyntiew Marthong jongka Khliehmawlieh Youth Club ula thep iaka kol ha ka minit kaba 6 katba u D Marngar ula ioh thep iaka kol ha ka minit kaba 55 ha kaba uba la shut na jngai ia ka bol bad katei ka bol kala leit rung shapoh kol.
Ka jingiakhun haka Sngi Palei kan long hapdeng ka Rangdajied United pyrshah iaka Rymbai Iawpynsing ha ka Group B kaban long ha Jowai ha ka por 2:30 mynsngi.
