Shillong, Jun 8: Ha Nongbah Tura bad Jowai yn pynlong iaka jingiakhun jong ki ar tylli ki semi phainal ka Meghalaya State League 2023 ha ka 10 tarik mynta u bnai.
Ia kane ka semi phainal yn pynlong arsien, ‘Home’ bad ‘Away’ bad iaka jingiakhun kaba ar yn pynlong ha ka 13 tarik mynta u bnai hi katba iaka phainal yn pynlong ha SSA Stadium, First Ground, Polo, ha ka 17 tarik u Jylliew.
Kila don 25 tylli ki kynhun kiba la iakhun iaka MSL hynrei tang 4 tylli kila shah jied bad ioh rung ha ka semi phainal kiba kynthup iaka Khliehmawlieh kaban iakhun pyrshah iaka Mawlai, ka Rangdajied United kaban iakhun pyrshah iaka Shillong Lajong.
Ka Rangdajied kan iakhun pyrshah iaka Lajong ha Kiang Nangbah Stadium, Jowai haka por 1:30 mynsngi katba ka Khliehmawlieh kan iakhun pyrshah iaka Mawlai ha PA Sangma Stadium, Tura ha ka por 3:30 mynsngi.
La pyniapher ia kane ka jingiakhun haka semi phainal ka long ba yn pyni ia kane ka jingiakhun ‘Live’ ha ka Youtube Channel jong ka Meghalaya State League’s (youtube.com/@meghalayastateleague).
Ha ka jingiakhun iaka semi phainal ha Tura, ka MP jongka Tura, ka Agatha K Sangma kan long kum ka kongsan.
