Shillong, Jymmang 22: Ka lympung ialehkai Meghalaya State League (MSL) 2023 kala sakhi ia ka jingialehkai ba bun bha ka jjingiathep kol hynne ka sngi Nyngkong ha kaba ka Jyntru kala pynliem ia ka Seng Samla Laitryngew da 9-4 kol.
Ha ka jingialehkai hynne ka sngi Nyngkong, ka Niaw Wasa United bala beh nadien ban jop ia ka Youth Club Pdengkarong da 2-1 kol ha ka Group B Jowai. Ka Wasa FC kala pynliem ia ka Warima Youth Club da 3-1 kol ha ka Group D, Tura bad ka Riangdo YSCA kala pynliem ia ka Mawten SC da 1-0 kol ha ka Group C, Mawkyrwat.
Ha Shillong, u nongialehkai substitute ka Jyntru Emanbha marbaniang ula ioh ban thep haduh 4 kol tang hapoh ka arphew minit shuwa ba kut ka jingialehkai kata ha ka minit ba 74, 79, 87 bad 90+5.
Baroh artylli ki kynhun kata ka Jyntru bad ka Laitryngew ki dang ap ia ka jingjop ba nyngkong ha kane ka lympung ialehkai hadien ba baroh artylli ki kynhun kila shah rem shisien bad iakhaid shisien.
Ha ka jingialehkai ha madan MDSA Mawkyrwat, ka Riangdo kala ioh thep lyngba u Phinilboy Rashir ha ka minit ba 70, ban ioh ia ka point ba nyngkong eh ha ka thup.
Haba phai sha madan Chandmari ha Tura, ka Wasa FC kala wan hakhlieh duh jong ka Group D da ka jingjop watla kala ialehkai kham bun sien bad ia kiwei ki kynhun kiba jan iakot ha ka jingiakamai point. Ka Wasa FC kala ioh haduh 7 point haba nubor bad ka Khliehmawlieh kaba ioh 6.
Ki jingialehkai ban long lashai ka sngi Ba-ar
Group A, Shillong – Umkseh vs Mawlai, 3pm
Group B, Jowai – Sein Pynbhalang vs Rymbai Iawpynsing, 2:30pm
Group C, Mawkyrwat – Seven United vs Pyndengrei, 3pm
Group D, Tura – Atong Matgrik vs Chipakkore, 3pm
