Shillong, Risaw 31: Ka 7 Wasa United kala shah pynrem da 2-0 ha ka Mawtari Myrdon ha ka Group E jong ka Meghalaya State League 2024 kaba la long ha Wahiajer, hynne ka sngi Palei.
U Silbestar Kharbani ula thep ia ar kol ha ka 54 bad 70 minit ban pynthikna ba ka Mawtari Myrdon kan jop ia kane ka jingialehkai.
Ka Mawtari Myrdon kala jop ha ka jingiakhun nyngkong pyrshah ia ka Seinbhalang Shkentalang da 3-1, katba ka 7 Wasa kala shah pynrem da 9-0 ha ka Shillong Lajong ha ka sngi sdang jong ka MSL.
Kane ka jingrem ka mut ba ka 7 Wasa kaba la long ka lahduh ha sien kaba la pynlong nyngkong eh ia ka MSL, mynta kan ym lah shuh ban ioh rung sha ka Quarterfinal.
Ki 6 tylli ki kynhun kiba long ki lahduh ha ki Group bad kiba wan Baar kin ioh rung sha kawei pat ka Round jong katei ka lympung iakob ialehkai Football.
Ka Lajong bad ka Mawtari Myrdon kila ioh mar 6 point kaba mut ba ka jingiakhun na ka bynta ka kyrdan kaba nyngkong bad baar ha ka Group E kan shong ha ka kti jong kitei ki ar tylli ki kynhun.
Ki jingiakhun ha ka sngi Thohdieng ha ka por 2 baje:
Group A (Tura): Chipakkore vs Lumsohkhlur
Group B (Mawkyrwat): Mawten vs Sutnga
Group C (Tyrsad): Mawlum Tyrsad vs Seven United
Group D (Khliehriat): Rangdajied United vs Mulait United
Group F (Shillong): Mawlai vs Pynursla
