Wahiajer, Rymphang 02: Ka Mawlai SC kala iohrah ia ka nam lahduh jong ka Meghalaya State League 2024 da kaba pynrem ha ka Tie Breaker da 5-4 ia ka Shillong Lajong FC ha ka phainal kaba la long ha Wahiajer Multipurpose Sports Complex Stadium.
Naduh ba sdang ka jingiakhun ha ka kylla step haduh ban da kut ka kylla miet kine ki nongialehkai jong kine ki artylli ki kynhun kim shym la lah satia ban ioh thep kol bad kane ka jingiakhun kala long kaba shongshit ha ryngkat ka jingwan sakhi ki paidbah da ki hajar ngut.
Hadien kane la pynlong sa ia ka Extra Time hynrei kine ki ar kynhun kim shym la lah ban thep kol ha kaba ki rangialehkai shadien kila pynkhlain bha ia ka rukom ialehkai ban pynthikna ba kin ym shah thep kol.
Ha ka jingshut ia ka Tie Breaker u Firstborn Roy Khongsti ka Lajong uba la leit shut ia ka bol ym shim la lah ban thep kol hadien ba u nongapkol ka Mawlai u Lambhamiki Lamare ula ioh iada ia ka bol ban rung shapoh kol bad kane kala pynlong syndon ia ka Mawlai ban ioh rah ia ka nam lahduh.
Ka Mawlai kala iohpdiang ia ka cheque kaba T.5 lak bad ka khusnam ia kaba la aiti da u Symbud Myntri Rangbah ka jylla u Bah Sniawbhalang Dhar ha kaba la iadonlang u MLA ka Jowai u Bah Wailadmiki Shylla, u President ka Meghalaya Football Association (MFA) Bah Hamletson Dohling, u General Secretary ka MFA u Bah Sunesh Syiem bad kiwei kiwei.
Ka Lajong kaba la wan baar ha kane ka jingiakob ialehkai kala ioh pdiang ia ka T.3 lak bad ka khusnam.
Ia ka MSL la pynlong da ka MFA bad la kyrshan da ka Directorate of Sports and Youth Affairs ka sorkar jylla naduh u snem 2017 ha kaba 24 tylli ki kynhun ialehkai na kylleng ki district ki wan iashimbynta ha kane ka lympung iakob ialehkai football.
Ia ka nam Player of the Final la ioh da u nongialehkai ka Lajong u Iohborlang Lyngdoh Lyngkhoi katba 3 ngut ki nongialehkai ka Mawlai kila ioh khur ia ka khusnam, ia ka Golden Glove ne u nongap kol bat bit tam la ioh da u Lambhamiki Lamare, u Khrawkupar Jana ula ioh ia ka Golden Boot uba la thep 12 kol bad u Damanbhalang Chyne ula ioh ia ka khusnam Golden Ball kum u nongialehkai uba kynsai tam ha kane tournament.
