Shillong, Naiwieng 4: Ka Mawlai SC bad ka Ladthadlaboh SC kila ioh rung sha ka Quarterfinal jong ka lympung ialehkai Footbal ka Meghalaya State League 2024 da kaba ioh khur ia ka jingjop hynne ka sngi Nyngkong.
Ka Mawlai kala pynrem da 10-0 ia ka Patharkhmah ha ka Group F kaba la long ha Shillong, katba ka Ladthadlaboh kala pynrem da 3-0 ia ka Seven United ha ka Group C kaba la long ha Tyrsad.
Ka Mawlai kala pynmih bun da ki nongailehkai kiba dang khynnah bad kala bteng ban khur iaka jingjop, u Samlang Rympei ula thep 4 kol ha ka 45, 45’+1, 50 bad 84 minit. U Balviky Marngar ula thep kol ha ka 22 bad 26 minit, u Arkibor Makhroh ula thep kol ha ka 23 minit, u Romarius Laban ula thep kol ha ka minit kaba 25, u Mewanshan S Nongkseh ula thep kol ha ka 51 minit bad u Mark Gareth D Shabong ula thep ia ka kol ha ka minit kaba 81.
Ka Mawlai kala ioh khur baroh 9 point na ki 3 tylli ki jingiakhun.
Ha ka jingiakhun hapdeng ka Ladthadlaboh pyrshah ia ka Seven United, ka Ladthalaboh kala ialehkai bha ha kaba u Sanki Langstang ula thep ia ka ko lha ka 38 minit, u Banteilang Shylla ula thep ha ka 40 minit bad u Lammida-o Dkhar ula thep ha ka minit kaba 90’+2.
Ka Ladthadlaboh ruh kala kamai 9 point na ki 3 tylli ki jingiakhun.
Ka Khliehmawlieh, kala pynrem ia ka Sutnga ha ka Group B da 1-0 ha kabau Wallambok Shangpliang ula thep ia ka kol ha ka minit kaba 87 ha ka jingiakhun kaba la long ha Mawkyrwat.
Ka Sutnga kala jop arsien ha ka jingialehkai bad ka donakm tang ban iakhaid ban bat ia ka kyrdan kaba nyngkong hynrei mynta ka Sutnga bad ka Khliehmawlieh kila ioh mar 6 point.
Ha Tura, ka Lumsohkhlur kala pynrem ia ka Attong Matgrik in Group A da 2-0, ka kol kaba nyngkong kala wan ha ka minit kaba 13 ia kaba la kum bakla bad thep hi shapoh kol katba iaka kol ka baar la ioh thep da u Jestibor Mawlong ha ka 21 minit bad ka Lumsohkhlur mynta kala ioh 6 point.
Ha ka Group D kaba ka jingiakhun la pynlong ha Khliehriat, ka Rangdajied United kala pynrem da 8-0 ia ka Iatyllilang Lumsehkot Raliang. U Pasborlang Khonglikong ula thep ia ka kol ha ka 21 bad 89 minit, u RT Hanson Pdang ha ka 37 minit, u Balamlynti Khongjee ula thep kol ha ka minit kaba 45, u Owanijuh Pajuh ula thep kol ha ka 58 minit, u Freddy Banteilang Jyrwa ula ioh thep kol ha ka 64 minit, u Manbhakupar Iawphniaw ula thp kol ha ka 74 minit bad u Aenam G Jyrwa ula thep kol ha ka 78 minit.
Ka Rangdajied United mynta kala ioh 7 point hynrei ka hap ban ap ia ka jingiakhun kaba khatduh kaban long hapdeng ka Rymbai Skhenshynriah (4 point) bad ka Mulait United (1 point) ban tip mano ban long lahdh ha katei ka Group.
Ka 7 Wasa United kala pynrem ia ka Seinbhalang Shkentalang da 2-0 ha ka Group E kaba la long ha Wahiajer. U Jeff K Rymbai ula thep ia ka kol ha ka 20 minit bad u Bannangsan Dkhar ula thep ia ka kol ha ka minit kaba 65.
Kine baroh ar tylli ki kynhun kim don shuh ia ka lad ba kin ioh rung sha ka Quarterfinal jongka MSL.
Ha ka sngi Baar kan don tang kawei ka jingialehkai ha ka Group C hapdeng ka Nangkiew Shaphrang Lumdiengngan pyrshah ia ka Mawlum Tyrsad.
Ka Resol mynta ka sngi:
Group A (Tura): Lumsohkhlur 2 – 0 Atong Matgrik
Group B (Mawkyrwat): Khliehmawlieh 1 – 0 Sutnga
Group C (Tyrsad): Ladthadlaboh 3 – 0 Seven United
Group D (Khliehriat): Rangdajied United 8 – 0 Iatyllilang Lumsehkot Raliang
Group E (Wahiajer): 7 Wasa United 2 – 0 Seinbhalang Shkentalang
Group F (Shillong): Patharkhmah 0 – 10 Mawlai
