New Delhi, Naitung 12 : Ka 2nd Meghalaya Pine Apple Festival 2024 ne ka tamasa pyninam ia u Sohtrun ba pynmih na Meghalaya bala pynlong ha Nongbah Delhi, kala pynshoh jadu ia ki paid ri-thor kiba don ha Delhi namar ka jingbym pat ju ioh mad ia u sohtrun uba ‘shngiam’, ‘uba bun um’ bad uba ‘thiang’.
Ka jingshit ka suinbneng bad ka jingkhluid ka lyer ha Nongbah Delhi kala nang pynkhring ia ki paidbah ba kin wan sha kane ka tamasa sohtrun kaba 5 sngi jong ka Meghalaya, ba kin wan mad ia u sohtrun bad thied ia ki jingbam bala shna na u sohtrun, kiba la pyniaid iew ha kane ka tamasa.
Ia kane ka tamasa la pynlong ha New Delhi Hat, Kalam Memorial-kaba la sdang naduh ka 10 tarik Naitung bad kut ha ka 14 tarik Naitung, 2024.
Kane ka tamasa ka dei kaba la pynlong da ka Sorkar Jylla ha ryngkat ka jingiatreilang bad ka Directorate of Horticulture, ka Meghalaya Heritage, ka Tnad Tourism ka Jylla bad kiwei kiwei.
Kane ka tamasa ka dei ka rynsan kaba ka Sorkar Jylla kala ai sha ki paid nongrep ka Jylla ban lah pynithuh ia u sohtrun ba ki pynmih sha ki iew ka pyrthei nalor ki jingbam ba ki pynmih na une u soh ba kynthup ia ki jam, umsoh bad kiwei kiwei.
Ka Shlem haba iakren bad ki nongwan sha ka tamasa kila pynpaw ia ka jingsngewkmen ba kila ioh ka lad ban wan sha ka tamasa namar ka ai ka lad ba kin ioh mad ia u sohtrun uba thiang bad ba shngiam tam bad uba bun um, u ba kim pat ju iohmad mynno mynno ruh.
Uwei na ki Rangbah na Delhi uba la wan sha ka tamasa ula ong “Nga la poi bunsien sha Meghalaya bad ngam ju klet ne iaid lait ban thied ia u sohtrun ba die ha ka surok National Highway na Guwahati sha Shillong. Kat kaba nga leit sha Shillong, nga ju ieng ha ki dukan die soh ha shilynter ka surok bad nga ju bam ia u sohtrun”.
“U sohtrun u dei u kynja soh ba pyn pangad bha khamtam haba shit kyrang. U long ruh u kynja dawai ba pyllait na ka jing tyrkhong ka met (dehydration) bad ba sait ia ka shadem” ula ong.
Une u Rangbah ulaong “Nalor u Sohtrun, u Sohniamtra ba pynmih ka Jylla Meghalaya ruh u dei uba kynsai tam, u bym ju lap nangno nangno ruh. Ka Sorkar Meghalaya ka dei ban pynlong ia ka tamasa sohniamtra ruh khang baka pyrthei kan tip”.
Ki Nongrep ka Jylla Meghalaya kiba shah jied ban iashimbynta ha kane ka tamasa ban pyniaid iew ia u sohtrun ba ki pynmih, kila pynpaw ba kane ka tamasa ka dei ka rynsan ia ki nongrep ba kin ioh ia ka iew jong ka pyrthei ban pyniaid iew ia u mar ba ki pynmih. Kila ong ba kane kan pynmyntoi shikatdei eh ruh ban kyntiew ia ka ioh ka kot jong ki bad ka dei ka jingai mynsiem ia ki paid nongrep ba kin im ha ka rep ka riang.
Ki Nongrep kila ai ka jingkhublei ia ka Sorkar Jylla kaba la plie ka lad ia ki ba kin pyninam ia ki jingthung jingtep ba ki pynmih sha ka pyrthei haba buh ka jingkyntu ba kum kine ki tamasa ki dei ban iai bteng na ka por sha ka por khnang ba kan wanrah shibun ki jingmyntoi ia ka Jylla.
