Nongstoin, Nailar 18 : Mano ban ngeit lada ong ba ka Miss Meghalaya kaba la pynphong da ki jain rem dor bad ki jingdeng ba thaba khriak khriak kan phong pat ia ka juti ba jot rathai? Kane ka jia ia ka Mawphanlur kaba don ha West Khasi Hills District.
Ka Mawphanlur ka dei ka jaka jngohkai kaba ithiang tam ka West Khasi Hills, kaba la khring ia ki nongshang suwari ym shu tang ia ki riew ieid mariang ka Jylla, hynrei jong ka Ri India bad na kylleng ki Ri ka pyrthei. Kane ka jaka ka jngai tang kumba 5 kilometer tam na ka shnong Markasa kaba don harud ka surok bah National Highway 44(E) Shillong-Tura.
Ka Tnad Tourism ka Jylla kala pynlut palat ia ka T. 3 klur ban kyntiew ia kane ka jaka kum ka jaka jngohkai ba kan lah pynbiang ia ki jingdonkam jong ki nongshang suwari, da kaba pynshna ia ki iingsah kiba itynnad, ki jing ker bad kiwei kiwei kiba kongsan ia ki jaka jngohkai ban don.
Ha kine ki khyndiat snem bala leit, kane ka jaka jngohkai kala sdang ban paw bha bad kala don ruh ha ka map ki jaka jngohkai ka Jylla Meghalaya.
Kane ka jaka kala sakhi ia ka jingkiew bun shah ha ka jingwan kai jong ki nongshang suwari, ki nongwan sahmiet kiba kwah ban pynlut khambun iaka por bad ka mariang lem bad kiwei kiwei.
Hynrei phewse, ka jingangnud jong ki nongpyniaid ban nang pynpaw nam shuh shuh ia kane ka jaka jngoh kai, kala shah kyrtoh da ka jingsniew palat jong ka surok-kaba la jot rathai ha baroh shilynter ka 5 kilometer tam kata naduh Markasa haduh Mawphanlur.
Ki nongshang suwari kat kiba leit ba wan sha Mawphanlur, kila sniew mynsiem bad sniew jinglong naduh ba leit haduh ba wan namar ka jingsniew palat jong ka surok, kaba la pynlong ruh ia kiba bun ban kiar syndon lailum laiwah ban leitkai sha kane ka jaka.
U Nongpyniaid jong kane ka jaka Bah Bony Lyngdoh Lyngkhoi haba iakren bad Ka Shlem, ula ong ba ka Tnad Tourism kala leh haduh katta katta ban kyntiew ia kane ka jaka jngohkai-kaba la iarap ruh ban kyntiew haduh katta katta ia ka ioh ka kot bad ka iohkam iohjam jong ki trai shnong khamtam ki samla.
Ula pynpaw ba ka jingsniew jong ka surok katba nang iaid ka por ka ia, kala ktah jur ia kane ka jaka jngohkai namar ka jingnang hiar ne duna ka jingwan ki nongshang kai.
Ula pynpaw ia ka jingbynniaw halor ka jingsniew jong ka surok bad kyntu jur ia ka Sorkar Jylla ba kan bthah ia ka Tnad PWD ba kan khmih bad leh eiei noh ia ka surok khnang ba kan lah ban pynurlong ia la ka jong ka thong “Ban kyntiew ia ki kam jngohkai ha Jylla”.
Ula pynpaw ba ka por kala dei ba ka Sorkar kan bthah ia ka Tnad PWD ba kan iatreilang noh bad ka Tnad Tourism khnang ba ki nongshangkai kin nym mad ia ki jingeh ha ka leit ka wan kumba ki mad mynta haba ki wan sha Mawphanlur.
U Bah Bony ula pyntip ba shen ma u ha ryngkat ki para dkhot ba pyniaid ia kane ka jaka jngohkai, kin sa leit iakynduh ia u Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong lem bad ia u Myntri ka Tnad Tourism Bah Paul Lyngdoh ban iakren halor ka jinglong jingman ka surok sha Mawphanlur.
 Shillong-Tura.){kind=link}