Nongpoh, Risaw 20 : Ka seng Ri-Bhoi Youth Federation (RBYF)-20 Mer Circle kala mih paidbah hynne ka sngi Thohdieng, ban maramot hi ia katto katne ki bynta jong ka surok Umling-Patharkhmah namar ka jingisangsot palat ia ka leit ka wan jong ki Khynnah skul ka St.Francis Higher Secondary School.
Ki Khynnah kane ka skul kila hap ban iad nalor ka ktieh bad ka surok kaba sniew namar ka jingjot palat jong ka surok kaba la shu ieh da ka Tnad PWD la bun bun snem.
Ka RBYF-20 Mer namar ka jingbym lah shah ban shu peit ia ka jingeh ki Khynnah, kala leit ban maramot ia ki katto katne ki bynta jong ka surok da kaba theh khyndew bad ki maw ha ki bynta bala sniew tam jong kane ka surok.
Kane ka jingmaramot kala sdang naduh ka por mynstep haduh ka por janmiet bad la ialam ia ka da u President Bah Lan Syngkli ha ryngkat u Vice Presdient Peter Syngkli bad u General Secretary Seibor Nongmalieh.
Kine ki nongialam ka RBYF ki la pynpaw ia ka jingsngewkhia kaba jur halor ka jinglong jingman jong kane ka surok ka ba la dap satang da ki thliew ki syar bad ka ktieh ha kiba bun ki bynta kaba la buh jingeh shikatdei eh ia ka leit ka wan jong ki khynnah skul kiba ju leit skul man ka sngi khamtam ha ki por lyuir.
