Nongstoin, Nailur 5: Ka JAC ki saw shnong ba kynthup ia ka Misei, Nongkabur, Nongporthanang bad Nongumkap, hynne ka sngi Ba-ar, kila iamih paidbah ban trei bad maramot hi dalade ia ka surok na Misei-Nongkabur shaduh Nongumkap.
Kane ka jingmih paidbah ban iatrei ia kane ka surok kala wan jia hadien ba kine ki Shnong kila ioh ia ka jingiarap na u MLA ka thain RG Momin, uba la ai sngewbha da ka song pisa.
Ka JAC ki saw shnong ha ka jingialam u samla Jeremiia Dkhar kum u President bad u Chester Ryntong kum u General Secretary lem bad ki Nongialam ba kham hakhmat, ki la kyrpad bad pynsngew ia ki paidbah ban noh synniang lem ban maramot hi ia ka surok kum ka dak ban pyni ba donkam ia ka jingkylla.
“Ka surok ka dei u budlum ka ioh ka kot, ka roi ka par bad khlem ka surok ka shnong ka thaw ka dong ka thain, kan nym phyrnai ha ka lawei pynban ka pynduk tasam ha baroh ki liang”, ong u President ka JAC u samla Jeremiia Dkhar.
U la ong ruh, “Ka JAC ki saw shnong ka phah ka kyrwoh khublei shikit iapar ia u MLA ka thain, u ba marsien ioh ka kot jingkyrpad ki paidbah lyngba ka JAC saw shnong, u la sngew la sngap ia ka jingkyrpad kyrpon ki paidbah ka thain”.
“Ka JAC ki saw shnong ka phah ruh ia ka kyrwoh kyrpad sha baroh ki trai jaka ba dei iaid kane ka surok, ba kin ai ka kti kamon kadiang ban noh kylluid mynsiem bad ban nym pynduh ne pynwit ia kane ka surok, khnang ba ynda ka la wan ka surok lyngba u Nongmihkhmat ka ophis ba dei peit bad na ka sorkar kan pynbha bad pynkylla rong ia ka dong ki shnong ha ka thain jong ngi”, u la ong biang.
