Imphal, Nohprah 17 : U Myntri Rangbah ka Manipur N Biren Singh ula ong ba dei namar ka thma kaba la pynlong haduh 6000 ngut ki briew na Myanmar ban wan shong riehtngen ha Manipur.
“Namar ka jinglong jingman ha Mynmar kumba 6000 ngut ki briew kila wan sha Manipur. Ngi la pynbiang ia ki da ka bam bad jaka sah kum ka jingiatip lem para briew. Kin dang don shuh shuh ki briew ban wan” ong u Biren Singh.
U Biren Singh ha ka sngi Saitjain ula phah peitngor halor ka jinglong jingman ha khappud khamtam ha Myanmar haba ai ksai ia ka jingsngeewkhia haba iadei bad ka jingwan rung ki briew nongwei.
Haba ban jur ia ki lad jingiada, ula ong ba ka jingpynrung kyrteng biometric ha ki jaka kum ka Kamjong bad Ukhrul bad ha kiwei ki jaka kum ka Behiang kaba don marjan ka Myanmar ka long kaba kongsan bha khamtam haba khmih ia ka jingiakynad kiba jia hapoh kane ka Ri ba marjan.
Haba ban jur ia ka jingdonkamban iarap ia ki briew ba wan phetwir, u Myntri Rangbah ula pynpaw ia ka jingdonkam ban ithuh ia kine ki briew lyngba ka jingpynrung kyrteng, ban ai jaka sah shipir khlem da shah ia ki ba kin buhai shnong shirta hapoh ki jaka khappud ka Jylla.
Namar ka jingkhie biang ka thma ha Myanmar, da ki spah ngut ki briew kila wan riehtngen ha Kamjong kaba don haduh 109 km u khappud bad ka Myanmar.
Haduh san tylli ki District ka Jylla ki don haduh 398 km u khappud bad ka Myanmar bad kine ki dei ka
Churachandpur, Chandel, Kamjong, Tengnoupal bad Ukhrul.
