Imphal, Naitung 26: Sa shisien ka kynhun ki paidbhur ha ka sngi Balang, kila wiang ding ia katto katne tylli ki Iing ha Moreh District bad kumjuh ruh ia artylli ki bos ba ju pyndonkam da ki bor pahara ha Kangpokpi District.
Kiba bun na kine ki Iing ki dei kiba thylli, kiba la ieh da ki nongshongshnong namar ka thma iapher Jaidbynriew. Kine ki Iing ki dei kiba don ha Iew Moreh kaba don marjan ka khappud Myanmar.
Kat kum ka khubor, kane ka jingwiang ding kala wan jia ruh hadien shisngi ba ki paidbhur kila thang ia ki artylli ki bos ba ju pyndonkam da ki bor pahara ha Kangpokpi District.
Kane ka jingshah thang ki bos jong ki bor pahara kala jia ha ka shnong Sapormeina katba kine ki bos ki dang wan na Dimapur.
Kat kum ka khubor, ka kynhun ki paidbhur kiba dei jong kawei na ki Jaidbynriew ka Jylla kila pynsangeh ia kine ki bos ba don u nombor plate ka Manipur bad pynbor ba kin talasi ioh don kiwei pat ki jaidbynriew ka Jylla ha kine ki bos.
Pule ruh: Dawa ka KSU ia ka MeECL ban thung kham bun ki Lineman ha New Shillong Township
