Imphal, Jylliew 8: Uwei u trai shnong uba 58 snem ka rta u la iap ha ka jingshah thombor ha ki kaikhlaw hadien ba la kynnoh ba ki riew thombor ki bym lah ban ithuh ki la siat ia ka kynhun ki nongshong shnong kiba lum dieng thang ha Manipur ha Kangpokpi district ha ka sngi Nyngkong.
Utei u lanot uba la khlad noh u dei uba la tip kyrteng kum u Chungjanglung Panmei (58 snem ka rta), uba shong ba sah ha ka shnong Pongringlong Part-I uba dei na ka jaidbynriew Rongmei Naga.
Katei ka jingjia ka la jia ha kawei ka jaka kaba long khlaw hajrong jong ka shnong Tupul kaba jngai kumba 40 km shaphang southwest jong ka New Keithelmanbi Police Station.
Hadien ba la mih ki khubor halor katei ka jingshah thombor, ki pulit ka Manipur ki la pynlong ia ka jingkhynra ha katei ka jaka.Ia ka met jong u Panmei la lap na katei ka khlaw ha ka por kumba 1:30 eiei nohphai sngi.
“Ngi la sdang ia ka jingtohkit halor kane ka kam.Ia ka met la phah ban leh ia ka post-mortem examination.Kiwei pat ki nongshong shnong ki la ioh lad ban phet krad, hynrei u Panmei u la mynsaw na ka jingshah siat ha ka kjat kamon jongu,” la ong uwei u heh pulit.
Kane ka jingjia ka la jia ha ka por ba ka jinglong jingman ka la sdang wanphai biang suki suki ha Manipur hadien ba la bun bnai ka jingkulmar jaitbynriew.Kane ka jingshah pyniap kaba dang shen ka la pynmih ia ki jingsngewkhia kiba thymmai halor ka jingshngain hapoh ka jylla.
Ha kajuh ka por, ki ba ha ïing jong ki 14 ngut ki nongshah rahbor jong ki Kuki ki la pynthymmai ïa ka jingkyrpad jong ki ban pyllait noh ïa kiba ieid jong ki da kaba suk bad khlem dab uh kano kano ka kyndon.Ki kynthei Kuki na ka sor Kangpokpi ki la iasnohkti lang ha ka jingiakhih shong kyllain mungor kaba dang iaid shakhmat ha ka shnong Taphou Kuki ha ka sngi Nyngkong.
Ki pulit ki la iathuh ba ka jingtohkit kaba bniah halor katei ka jingshah siat ka la iaid shakhmat.
