Imphal, K’lyngkot 24 : Uwei u shipai ka Assam Rifles ula synreit kuli iala ki jong ki paralok bad hadien ula shim syndon iala ka jong ka jingim ha ka sngi Balang hapoh ka Assam Rifles Battalion, kaba don marjan ka khappud Indo-Myanmar ha South Manipur.
Ka Assam Rifles ha ka kyrwoh, kala iathuh ba une u shipai ula pynmynsaw ia hynriew ngut ki paralok shipai (baroh kim dei na Manipur) shuwa ban pynphai ia ka suloi bad siat iap ialade. Kine kiba mynsaw kila tip briew mynta bad la pynkyn riah ia ki sha Military Hospital ba kin ioh ia ka jingsumar ba paka.
Ka kyrwoh kala pynshai ruh ba kane ka jingjia kam don jingiadei satia bad ka jingjia umsnam ha Manipur bad kyntu ia ki briew ba kin ym pynsaphriang ia ki khubor hamsaia ba ialam bakla.
