Imphal, Naitung 21: Palat 3000 ngut ki Kynthei Kuki hynne ka sngi Thohdieng, kila pynlong ia ka jingiakhih da kaba iashong kyllain mungor ha Moreh ban pynpaw ia ka jingpyrshah halor ka jingshah iuhroit ka hok longbriew manbriew jong ki paid Kuki ha ka Jaidbynriew Meitei.
Ia kane ka jingiashong kyllain mungor la pyniaid da ka Kuki Women Union and Human Rights, Moreh.
Ki nongiakhih kila rah ruh iala ki placard ba thoh “Ki kynthei Kuki kila shah jrong kti bad shah lehbeijot pathar ha ki Meitei”, “sdien phasi ia ki briew ba donkti”, “Ngim lah ban im bad ka Sorkar leh beijot”.
“Mynta ka sngi, ngi pynlong ia ka jingiashong kyllain mungor pyrshah ia ka kam leh riewkhlaw bad jingbym iatiplem shuh parabriew pyrshah ia ki arngut ki Kynthei kiba shah leh beijot bad shah pyniaid lyngkhuit. Ngi pynrem jur ia kane ka jingjia bad dawa ia ka Sorkar ba kan ai ka jingpynsajia ba tyngeh pyrshah ia ki briew ba donkti” ong ki Nongiakhih.
Kila ong “Ka dei ka jingiuhroit ia ka hok longbriew manbriew jong ki Kynthei Kuki, Khynnah.
Dei ban ai ka jingbishar ba hok ia ki nongshah leh beijot”.
Kine ki Nongiakhih kila dawa ruh ban shu rai pyniap beit ia ki briew kiba donkti ha kane ka jingjia bad kyrpad ruh ia ki kynhun hapoh ka Ri bad ka Pyrthei ba kin tuklar ha kaban pynioh ia ka jingbishar kaba hok.
Pule ruh: Dawa ka JSU ia ka Summer Capital ha Ri-lum Jaintia, ka HYC ia ka Autumn Capital ha WKH
