Imphal, Iaiong 25 : Ki trai shnong ka Kongpokpi District, kila iamih paidbah ban shna hi dalade ia a surok by-pass hadien ba ki kynhun kaikhlaw kila pynjulor ia ka jingkieng jong ka National-Highway-2, kaba la jia hashuwa ka elekshon Phase-II jong ka Lok Sabha ha Jylla.
Ki trai shnong kila shu mait hi ia ki lum ban shna ia ka surok khyndew bad ki kali kila ioh ban iaid na kane ka surok ia mynta shipor ba dang julor ka jingkieng.
Ka jingkieng kala julor klai bha haduh ba ki kali kim long shuh ban iaid lyngba. Ki trai shnong haba mad ia ka jingsohsat, kila mih ban shna hi ia ka surok ba shipor tang ban ioh iaid kali.
Kane ka jingkieng ha Kangpokpi District, kaba pyniasoh ia ka Imphal bad ka Nagaland, Dimapur, kala julor jubor bha na ka jingbthei u bomb IED, kaba jia ha ka miet sngi Ba-ar.
Ka seng KSO-Sadar Hills kala pynrem jur ia kane ka jingpynbthei bomb kaba la jubor bha ha ka miet sngi ba-ar kaba la pynjulor klai bha ia ka slab jong ka jingkieng, kaba pyniasoh ia ki thain jong ki Kuki na Sapormeina bad ka Kangpokpi.
Ka KSO ka ngeit skhem ba kane ka kam pyntriem ka dei kaba la leh da ki kynhun jong ki Meitei ban pynhiar kput ia ki paod kuki kiba lui lui.
Ka KSO kala maham ruh ia baroh ki briew kiba ioh rung ioh mih laitlan ha ki thain jong ki paid Kuki ba lada shem ba ki iadonkti, ki lahban shah pynduh noh ia ka hok ban iaid laitlan.
