Imphal, Risaw 30: Ki bor pahara jong ka Manipur, kila kem noh ia kawei ka longkmie halor ka jingkynnoh ba kala pynngop ia ki khun samla lyngba ka mobile phone ba kin pyniasoh sha ki seng kaikhlaw, khamtam eh ka People’s Liberation Army (PLA) kaba la shah khang bad niew beain, ka kynhun kieng atiar jong ka Revolutionary People’s Front (RPF).
Ia kane ka longkmie la tip kyrteng kum ka Ningthoujam Anita Devi kaba ju khot sin Rashida (44) snem ka rta, kaba dei ka nong shong shnong ka shnong jong ka Sairemkhul Maning Leikai ha Imphal West district.
“Kane ka longkmie kala pynrung dkhot ia ki khun samla sha ki kynhun seng kaikhlaw. Ki tnad syntiat kila buddien bha ia kane ka longkmie bad la kem noh ia ka na ka iing sah jong ka,” ong u wei u ophisar.
Katkum ka report na ki pulit, la iathuh ba ha ka jingtohkit ba nyngkong la lap ba ka donkti ban pynrung ia kawei ka khynnah kynthei na Jiribam District sha ka RPF/PLA. Naka ki pulit kila ioh ban kurup kawei ka mobile phone bad kawei ka card Aadhaar.
Ia kane ka longkmie ba shah kem bad kumjuh ruh ia ki tiar kiba la ioh ban kurup, la aiti noh sha ka Police Stattion ba dei peit na ka bynta ban leh ia ka jingtohkit ha kaba iadei bad ka jingpynrung dkhot.
Ki pulit ki la iathuh, ka jingtohkit kaba bniah ka dang iaid shakhmat.
