Imphal, Jymmang 08 : Ka jinglong jingman kala sdang ban wan phai biang sha ka jingjai jai kumba ka ju long ha Manipur kaba la don hapdeng ka jingkulmar bad jingiaumsnam iapher jaidbynriew bad hynne ka sngi Nyngkong la sakhi ba ki nongshongshong kila sdang ban ia mih nala ki jong ki Iing ha Nongbah Imphal ban iathied ia ki marbam mardih hadien ba la pynjynsur biang ia ki kynta treikam ka korphiw.
Ha kajuh ka por, ki shipai kila nang pynkhlain ia ka jingpynher ia ki drone bad ki helicopter ban peit thuh ia ka jinglong jingman ha ki jaka kiba jur eh ka jingiakynad jaidbynriew.
Ki shipai Indian Army bad Assam Rifle kila nang bteng ban pynlong ia ka flag march ha kylleng ki jaka kiba jur ka jingiaumsnam ha kine ki khyndiat sngi bala leit noh.
U Myntri Rangbah ka Manipur N Biren Singh ula ong ba ula sngewnguh eh ia u Myntri kam Pohiing ka Ri Amit Shah halor ki jingiarap ai jingmut bad ai jingkyrshan ha kaban tehlakam ia ka jinglong jingman hapoh ka Jylla.
Haduh mynta, haduh 23000 ngut ki briew la ioh ban iarap ban pynkynriah na ki jaka ba jur ka jingiaumsnam bad ia kine ki briew la ai jaka sah ha ki jaka jong ki shipai.
Ka jingiaumsnam kala mih ha ka 3 tarik Jymmang hadien jong ka rally jong ka ATSUM ha ki 10 tylli ki District ka Jylla ban pynpaw ia ka jingpyrshah halor ka jingdawa jong ka Jaidbynrew Meitei ban ai jingithuh lem ia ki kum ki Scheduled Tribe ka Jylla. Haduh 54 ngut ki briew kila iap na kane ka jingiakynad pher jaidbynriew.
Ia ka korphiw bala pynjari naduh ka sngi Balang hadien ba mih ka jingkulmar, la pynjynsur naduh ka 5 baje mynstep haduh 8 baje mynstep ha Imphal West District ban ailad ia ki nongshongshnong ba kin leit iasiew iatda ia ki marbam mardih.
Ki Nongshongshnong, kiba la ioh ia ka jingiarap na ki shipai Indian Army bad Assam Rifles, kila ai khublei ia kine ki shipai halor ka jingtrei borbah ban wanrah pat ia ka jinglong jai jai hapoh ka Jylla.
