Imphal, Nailur 09: Ki samla pule ka Jylla Manipur hynne ka sngi ki la pyrshang ban tur paidbah sha ïing sah u Myntri Rangbah ka Jylla bad sha Raj Bhavan ha Imphal ban pynpaw ia ka jingpyrshah halor ka jingbym lah jong ka Sorkar Jylla ban wanrah iaka jingsuk hapoh ka Jylla kaba la neh mynta la palat 1 snem.
Ki samla Pule ha ryngkat ki Uniform, ki la kwah kynduh ia u Lat ka Jylla ban iakren halor ki kam iaumsnam bad ki jinglong jingman hapoh ka Jylla bad kila pyrshang ruh ban rung jubor sha Raj Bhavan bad sha iing sah u Myntri Rangbah.
Ki samla pule ki dawa ban weng noh ïa ki bor pahara ka Sorkar Pdeng kiba la buh ha kylleng ka Jylla daka ba kynnoh ba ki bor pahara ka Sorkar Pdeng kim shym la lah ban wanrah biang ia ka jingsuk kaba la neh mynta la palat 1 snem.
Hadien ba ki la shah khang ban rung sha Raj Bhavan, ki samla pule kila pynlong ia ka jingiakhih daka ba shong habar ka Raj Bhavan.
Ia kane ka jingiakhih, ki samla pule kila leh ban pynpaw ka jingbitar jong ki sha ka Sorkar Pdeng bad ka Sorkar Jylla ha ryngkat ka jingkynnoh ba kim lah ban pynbeit ia ka jingeh ki paidbah bad ka Jylla.
Ki samla pule kila dawa ruh ban weng noh ia u Security Adviser jong ka Jylla bad ban aiti noh ia ka Unified Command sha ka Sorkar Jylla.
Ka Sorkar Manipur, ka la rai ban khang khyrdep ia ki jaka pule ha kylleng ka Jylla, namar ka jingjur jong ki kam thombor, kaba kynthup ia ka jingpyndonkam ia ki drone bad ki rocket da ki suba kynhun lehnoh.
Ka Sorkar ka la pynbna ba ki jaka pule ha kylleng ka Jylla Manipur kin khang haduh ka 10 tarik u Nailur bad naka liang ki samla pule ki pynpaw ka jingsngewdiaw daka ba kynnoh ba kane kan ktah iaka pule puthi jong bad kane kadei tang ka daw jong ka Sorkar Pdeng bad Sorkar Jylla namar kim lah ban wanrah biang iaka shong suk shong shngain hapoh ka Jylla.
