Imphal, Jymmang 29: U Myntri Rangbah ka Jylla Manipur, u Yumnam Khemchand Singh, u la iathuh ba ki Pulit ki la kem ia saw ngut ki briew kiba suba don jingiadei bad ka jingrahbor ia ki 6 ngut ki riew ngut ki Naga.
Haba kren sha ki nongthoh khubor, u Singh u la ong ba ki bor pahara ki dang bteng ia ka jingwad bniah bad jingkhynra ban lap ia ki nongshah rahbor.
U la ong ba ka sorkar ka dang shim khia bha ia kane ka kam bad ka jingtohkit ka dang iaid shakhmat ban lap bad kem ia kiwei pat kiba donkti ha kane ka kam.
U myntri rangbah ka jylla u la leit jngoh ruh ia ka jaka ai jingiarap ia ki briew kiba la tip kum internally displaced persons (IDPs) ha ka Balang Makhan Baptist, ha kaba kumba 35 ngut ki briew ki dang sahkut mynta bad shong rieh tngen.
Ki briew kiba sah ha kane ka jaka ki kynthup ïa ki kynthei bad ki khynnah na ka shnong Konsakhul kiba la shah bat kham mynshwa bad hadien la pyllait noh da ki riew runar kiba don tiar.
Ha kane ka jingleit jngoh, u Singh u la sam ïa ki jingïarap kiba kynthup ïa u khaw, u phan, u piat, u shini, ka umphniang bam, ki sla sha bad ki biskit.
U la jurip ruh ia ka Community Hall jong ka shnong bad u la iakren ia ki jingpynbeit ban pynsah kham bun ia ki briew kiba la shah pynkynriah jaka bad ki bor synshar shnong bad ki nongialam shnong.
La bthah ia u Deputy Commissioner ka Kangpokpi ban pynbiang ia ki tiar ba kongsan kum ki tusok thiah bad ki masuri.
Kitei ki saw ngut kiba la shah kem ki kynthup — u Thangkhomang Khongsai (51 snem), u Seikholet Khongsai (40 snem), u Lunminthang Dimngel bad u Kamgoulal Khongsai (30 snem) la suba ba ki dei ki nongtrei mon sngewbha jong ki kynhun trei mon sngewbha shnong kiba don tiar ha Kangpokpi bad la ngeit ba ki donkti ha ki kam pyrshah imlang sahlang, ki kam pyntriem bad ki kam dawa pisa nalor kiwei pat.
Kane ki jingkem ka la jia hadien katto katne sngi ba ka sorkar jylla ka la aiti ia ka mukotduma kaba iadei bad ka jingshah rahbor jong ki Naga, kumjuh ruh ka jingshah pyniap jong ki lai ngut ki nongialam Balang kiba dei na ka jaidbynriew Thadou, sha ka National Investigation Agency (NIA).
