Imphal, Risaw 01 : U Myntri Rangbah ka Manipur N Biren Singh ha kajanmiet sngi U Blei ula pyntip ba ki riewkiengatiar kiba donkti ban rahbor bad pyniap ia ki arngut ki samla pule, kila shah kem mynta na Churachandpur.
Haba thoh ha ka X, u CM ula ong “Nga sngewkmen ban pyntip ba katto katne ngut na ki briew kiba donkti ban rahbor bad pyniap ia Phijam Hemanjit bad Hijam Linthoingambi, kila shah kem hynne ka sngi na Churachandpur”.
“Kumba ju ong, don kiba lah ban iaid lait hadien ba ki leh kam bymman hynrei kin ym laitphet na ki kti ba jrong jong ka Ain. Ngi la kut rai skhem ban pynthikna ba kin ioh ia ka jingpynsajia ba tyngeh kynthup ka rai pyniap namar ka kam ba shyrkhei ba kila leh” ula ong.
Haba kren bad ki nongthoh khubor, ula ong ba u Myntri kam Pohiing ka Ri Amit Shah ula phah ia u Special Director ka CBI lem bad katto katne ki Ophisar sha Manipur bad mynta ka sngi da ka jingkyrshan ki shipai, ki Assam Rifle bad ki Pulit, ngi la ioh kem ia 4 ngut ki briew ba donkti na Churachandpur. Kane ka dei ka jingjop kaba khraw. Nga kwah ban ai khublei ia ia NIA, CBI bad baroh ki bor pahara ka Sorkar Pdeng”.
