Imphal, K’lyngkot 10: Wat hapdeng ka jingthmu jong ka Congress ban pynlong ia ka Bharat Jodo Nyay Yatra ha Imphal, ka Sorkar ba ialam da ka BJP ha Manipur kam pat ai jingbit satia ban pyndonkam ia ka madan Hapta Kangjeibung, kaba don ha Imphal East na ka bynta kane ka rally.
Kane ka rally ka dei kaba lamkhmat da u President barim ka Congress Rahul Gandhi bad la buh ban pynlong ia ka ha ka 14 tarik Kyllalyngkot.
Namar ka jingjur ka jingiather kuli hapdeng ki kynhun kaikhlaw bad ki bor pahara ha Moreh, u Myntri Rangbah ka Jylla N Biren Singh ula pynpaw ia ka jingsngewkhia ba lah ban mih biang ki jingiather kuli. Ka jingkhynra kaba jur bha ka dang iaid mynta ha ka thain Moreh ban iohkem ia ki riew kiengatiar.
U Myntri Rangbah ula ong “Ka jinglong ka suk ka sain hapoh ka Jylla ka long kaba ima bha.
Ban ai jingbit ia ka rally u Rahul Gandhi ka dang don hapdeng ka jingbishar bad ngi dang pan kaiphod na ki kynhun pahara bapher bapher. Hadien ba ngi iohpdiang ia ka kaiphod, ngin sa lah ban shim ia ka rai”.
U Eastern Army Commander ba dang shu thung thymai Lt. Gen RC Tiwari, ula hiar jurip ia ka Imphal mar syn jia ka jingiather kuli hapoh Moreh, ban peit ia ka jinglong jingman ha ka thain.
