Imphal, Jymmang 01:Na ka liang u Myntri ka sorkar pdeng uba khmih ia ka tnat Environment Forest and Climate Change, u Bhupender Yadav hynnin ka sngi U Blei u la ong ba ka jingai jingiada ia ki khlaw ki btap ka dei ka jingkitkhlieh ba pura jong ka sorkar jylla.
Haba kren sha ki lad pathai khubor, u Bhupender Yadav u la ong, “Ki jaka khlaw barabor ki hap ha ka jinglong trai jong ka sorkar jylla.Ka Forest Act 1927, hadien ba la ioh la ka jong ka jinglaitluid ka dei ka bynta jong ka sorkar jylla.Hynrei, hadien ba la pynkylla ha ka snem 1976 ki jaka khlaw ki hap hapoh ka jingkhmih jong ka sorkar jylla bad ka sorkar pdeng.Hynrei, ka jinglong trai ia ki khlaw ki btap barabor ka leit sha ka sorkar jylla.Ban iada ia ki jaka khlaw ba aijingiada kyrpang bad ia kiwei pat ki jaka khlaw ka hap hapoh ka jingkitkhlieh ba pura jong ka sorkar jylla.”
Kane ka jingkren jong u Yadav ka la wan long hadien ba ki la mih ki jingiakhih pyrshah ha ka jylla halor ka jingshah kyndang jong ki nongshong shnong na ki jaka khlaw sorkar.
Ha kaba iadei bad ka jinglong jingman ha ka jylla, kim shym la don shuh kino kino ki jingiakynad kiba thymmai haduh hynnin ka sngi U Blei ha ki bynta shathie ka Manipur hapoh Churachandpur district kaba la sakhi ia ki katto katne ki jingiakynad, ka jingshah thang bad ka jingshah pynjulor ki jingdon jingem jong ka sorkar naduh ka miet sngi Palei ba la lah.
Katkum ki khubor sorkar la ong ba ka jingpynjari ia ka korphiw miet da ki bor pyniaid ha Churachandpur district kaba naduh ka por 5 baje janmiet haduh 5 baje mynstep kan dang iai bteng kat haduh ban da pynbna da kumwei pat.
Baroh ki dukan, ki iew ki hat bad ki jaka treikam ki la plie biang hynnin ka sngi U Blei, katba ki kali kamai bad kiwei pat ki kali ruh ki la iaid biang kumba ju long hapoh ka sor rit Churachandpur lem bad kiwei pat ki bynta jong kane ka district.
Na ka liang u Director General of Manipur Police u P. Doungel lem bad ki heh sorkar ha ka sngi Saitjain ba la lah ki la pynlong ka jingleit jurip ia ka Churachandpur district bad bishar bniah ha kaba iadei bad ka jinglong jingman baroh.
Hadien ka jingiakynad kaba la jia ha ka sngi Palei ba la lah, na ka liang u Myntri Rangbah (CM) ka jylla u N. Biren Singh u la pynsangeh noh ia ka jingleit jurip ha ka sngi Thohdieng kaba bud shapoh Churachandpur district. U Biren Singh u la dei ban leit aijingkren ha ka jingialang paidbah hapoh Sadbhavna Mandap ha New Lamka Town ha Churachandpur bad ruh ban plie ia ka jaka kilan met ba la tip kum ka ‘Open Gym’ hapoh PT Sports complex.
Na ka liang ka seng Indigenous Tribal Leaders’ Forum (ITLF) ruh ka la khot pynlong da ka pakhang shnong kaba phra kynta ha Churachandpur district ha ka sngi Thohdieng ba la lah ban pynpaw pyrshah ia ka jingkyndang jong ka sorkar ia ki nongshong shnong kiba shong ba sah ha ki jaka khlaw sorkar.
Ki jaka khlaw ha ki thain jaka lum hapoh Churachandpur district ha ki bynta shathie ka Manipur, kata kaba khappud bad ka Myanmar bad Mizoram ka dei ka thain kaba don ia ki kynhun seng lehnoh bapher bapher kiba dei na ki jaidbynriew Kuki-Chin.
