Imphal, Nailar 25 : Ka Iingkashari Supreme Court ha ka sngi Thohdieng ba ka jingtian bishar ia ki case bala aiti tohkit sha ka CBI kan long noh ha Guwahati bad bthah ia u Chief Justice ka Guwahati High Court ban thung ia u Judge uba nang ban kren bad sngewthuh ia kawei ne bun ki ktien ka Jylla Manipur.
Kala ong ba ki don ki lanot ha ki District ka Jylla Manipur bad kan long kaba shitom ia kine ki lanot na ki valley district ba kin leit sha ki hill district ka Manipur bad kumta, la sngewdei ban rah noh ia ka jingtian bishar sha Guwahati.
Ka Iingkashari kala hukum ba baroh ki application ban wanrah tian bishar ia ki nongshah kynnoh, judicial custody, pynjlan ia ka custody bad kiwei kiwei ki jingtian bishar la shah ban leh online haba buh hakhmat ia ka jingjngai bad ka jinglong shngain jong ki Iingkashari ha Manipur.
Kala hukum ruh ba ia ka judicial custody la ailad ban leh ha Manipur haba bthah ba ia ka jingbatai jong ki nongai sakhi hapoh ka kyndon 164 CrPC la dei ban leh ha ka jingiadonlang ki Magistrate ka Manipur.
Ka Iingkashari Supreme Court kala bthah ia u Acting Chief Justice ka Manipur High Court ba un thung ia uwei ne katto katne ngut ki Magistrate ba kin shim jingthoh ia ki jingai sakhi ki nongsakhi.
Ka SC kala ong ruh ba ia ka test indentifcation parade lane ka jingpyniaid ia ki nongshah kynnoh ban pynithuh, dei ban leh lyngba ka video conferencing ha ka jingiadonlang ki Magistrate na Manipur.
Ka jingkyrpad ban wad bad kem ia ki briew kiba donkti yn sa pynmih da ki investigating officer lyngba ka kor online, ong ka Iingkashari.
