Imphal, Rymphang 10: Ki bor pyniaid district jong ka Ukhrul, hapoh ka jylla Manipur ki la pynjari da ka curfew kaba khlem buh por bad khang ruh ïa ka jingtreikam ka kor internet na ka bynta san sngi hadien ba la mih thymmai ka jingïakynad kaba lam sha ka jingia thang iing bad ka jingiasiat suloi.
La iathuh ba katei ka jingkulmar, ka la mih ha ka miet jong ka sngi Nyngkong, hadien ba ki runar, ki la thang ia ki iing ha ka shnong Litan Sareikhong bad siat bun tylli ki kuli ha suin, kaba la pynmih ia ka jingsyier ha ki nongshong shnong. Katto katne ngut ki longïing ki la hap ban phet krad na la ki ïing ki sem jong ki ha ka shi miet namar ba ka jingïakynad ka la nang jur ha ka thaiñ.
Halor kane, u Home Commissioner-cum-Secretary jong ka Manipur, u N. Ashok Kumar, u la pynmih ïa ka hukum ban pynsangeh noh ïa “ki jingshakri internet/data, kynthup ïa ki jingshakri lyngba ka broadband, VPN bad VSAT” ha kylleng ka district Ukhrul, na ka bynta san sngi, kaba sdang naduh ka por 11:30 baje mynstep jong ka sngi Ba-ar.
Ka hukum ka la batai ïa ka jingpynsangeh ka long kum ka lad jingïada haba ïadei bad ka jinglong jingman kaba lah ban ktah ia suk ka sain bad ka “jingtieng ba ki katto katne ki riew pyrshah ïa ka imlang sahlang ki lah ban pyndonkam bakla ïa ki social media da ki dur, ki jingthoh bad ki video ban pynmih.”
Wat hapdeng ka jingpyntreikam ïa ki hukum khang katkum ka kyndon 163 jong ka Bharatiya Nagarik Suraksha Sanhita (BNSS) “haduh ban mih kiwei pat ki hukum” bad ka buh mar mar ia ki bor pahara jong ka Central Armed Police Forces (CAPF), ki jingjia jong ki kam thombor ki la ïai bteng ha kiwei ki bynta jong ka district.
Ki heh ophisar sorkar ki la iathuh ba ka jinglong jingman ka dang bteng ha kine ki san sngi ba la dep, ha kaba la mih khubor ba ki iing ki sem ki la shah thang ha ki seng lehnoh. Ki bor pahara ki la pynkhlain ïa ki jingpahara ha ki jaka ba don ki rit paid ban ïada na ka jingjur shuh shuh.
“La pynjari ïa ka Curfew bad la pynsangeh ïa ka internet na ka bynta san sngi ban pynlong biang ïa kane ka jaka sha ka jinglong kaba rim.Ka jingpahara baroh shisngi ha ki jaka ba sngewkhia ka la ïaid da ki bor pahara jong ngi,” ong uwei u heh pulit.
Ki bor pyniaid district ki la kyntu ia ki nongshong shnong ban pynneh ia ka jingsuk bad ban iatreilang bad ki bor pahara katba ki pyrshang ki dang iai bteng ban pynbeit ia ka jinglong jingman.
